Kyrpad ka HBDRF ïa ka Regional Committee ba leit jurip sha ki shnong ki thaw ka Block I & II
Shwa ban sdang ka jingïakren pynbeit pud
Shillong, Naitung 03: Ka Hynniewtrep Border Dispute Redressal Forum (HBDRF), kila kyrpad ïa ka sorkar jylla bad kumjuh ruh ïa ka Regional Committee ba la thaw ban pynbeit ïa ka jingïakajia pud hapdeng ka Assam bad Meghalaya ba kin da leit jurip sha ki shnong ki thaw jong ka Block 1 & 2.
Na ka liang jong u Chairman jong ka HBDRF u Bah Chandame Sungoh ha ka Thohdieng u la leit ban aiti da ka dorkhas sha u Myntri Rangbah ka jylla u Conrad K Sangma bad kumjuh ruh saha u Bah Sniawbhalang Dhar uba dei u Chairman jong ka Regional Committee.
Namar ka jingbym don kine ki heh sorkar ha secretariat na ka liang jong ka HBDRF kila shu aiti noh ïa ka dorkhas sha ki ophisar jong u Myntri Rangbah bad kumjuh ruh jong u Symbud Myntri Rangbah.
Katkum ka dorkhas, ka HBDRF kyrpad ïa ka Sorkar, ïa u Myntri Rangbah ka Jylla u Conrad K Sangma, ïa u Chairman jong ka Regional Committee u Bah Sniawbhalang Dhar uba dei ruh u Symbud Myntri Rangbah, bad ïa baroh ki dkhot ba donkti jong ka Regional Committee ban leit jngoh ïa baroh ki shnong Khasi Pnar kiba don ha Block 1 bad Block 2.
Shuh shuh kala kyntu ruh ïa ka sorkar bad ïa ka Regional Committee ba kadei ban pynlong da ka jingïatai ne ïathir sani bha jai bad ki paidbah nong shong shnong katei ka thain bad ruh ban sngap ïa ka jingsngewkhia ka jong ki.
Ka long kaba donkam ïa ki dkhot jong ka Regional Committee ban ïatreilang bad kiba don bynta kum ki Dolloi, ki nongialam sengbhalang, ki Waheh Chnong, bad kiwei kiwei kumba la buh ha ki kyndon jong ka jingpynbna sorkar, ong ka dorkhas.
Shuh shuh ka Forum ha ka dorkhas ka kular ruh ban ai ka jingiatreilang bad ki kyrmen skhem ba ïa kane ka jingïakjia bud kaba la slem bha yn lah ban pynbeit noh, ka ban ailad ïa ka khyndew ka shyiap jong ngi ban ïasoh biang bad ka jaka kaba hap hapoh u pud u sam jong ka ri Khasi.
Halor ka jingthaw jong ka sorkar ïa ka Committee, ka Forum ka pynpaw ïa ka jingsngewnguh ïa ka Sorkar Meghalaya kaba la thaw ïa ka Regional Committee kaba thmu ban pynbeit ïa ka jingïakajia pud kaba la sahteng hapdeng ka Jylla Meghalaya bad ka Assam.