Nongpoh, Nailar 23: Ka Hynñiewtrep Achik National Movement Western Ri-Bhoi kala kyrpad ïa u MLA ka Jirang u Bah Sosthenes Sohtun ba u dei ban kren ïaka jingeh jong ki paidbah ka thaiñ Jirang haka Dorbar Synrai ka bala sdang naduh mynta ka sngi ha iing dorbar thawaiñ ka jylla.
Ki mat kiba ka seng kala buh hakhmat ki kynthup ïa ka surok Belahari sha Rajakhomai, ban buh noh kawei ka Police Outpost ha Balakhawa, ka Fire and Emergency Service Station ha Patharkhmah, ban pyntreikam pura ïaka Patharkhmah Civil Sub Division, ban pyndep bad plie noh ïaka Model Degree College ha Patharkhmah khamtam ban wanrah shibun ki skhim pynroi naka bynta ki shnong khappud jong ka Jirang Constituency.
Ha kajuh ka por naka liang ka seng lyngba u Samla Sumar Lyngdoh President ka HANM Western Ri-Bhoi kala buh ruh ka jingkyrpad naduh u Myntri Rangbah bad ki Myntri sorkar ba ki dei ban kren eiei halor ka jingkren jong u Himanta Biswa Sharma Myntri Rangbah ka Assam ban pynduh kam sorkar ïaki samla pule kiba la pyndep ïaki jingpule naka skulbah University of Science and Technology Meghalaya, namar ka jingshun jong u Himanta Biswa ïa katei ka skulbah ka ktah pat ïaka lawei ki samla pule.
