Mawkyrwat, Naitung 03: Ka Ophis jong ka Deputy Commissioner (Election), South West Khasi Hills District, ka pyntip paidbah ba ka Election Commission jong ka India (ECI) ka dang pynlong ïa ka Special Intensive Revision (SIR) jong ka Electoral Roll 2026 ha baroh kawei ka Ri India, kynthup ruh ïa ka Jylla Meghalaya.
Kane ka jingpynbeit thymmai ïa ka Electoral Roll ka la sdang naduh ka 20 tarik Jylliew, 2026 bad kan bteng haduh ka 7 tarik Risaw, 2026. Kum shi bynta jong kane ka kam, ki Booth Level Officer (BLO) kin leit rung ha man la ki ïing ki sem ban sam ar tylli ki Enumeration Form sha man uwei pa uwei u nongthep vote uba dei hok.
Kane ka jingsam bad jingïoh lum biang ïa kawei ka Enumeration Form kaba la dep pyndap bad soi da u nongthep vote kan long naduh ka 30 tarik Jylliew haduh ka 29 tarik Naitung, 2026. La kyrpad ïa baroh ki nongthep vote ba kin pyndap hok ïa kawei ka Form bad aiti pat sha ki BLO hapoh ka por ba la buh.
Hadien ba la pyndep ka jinglum ïa ki Enumeration Form, yn pynmih ïa ka Draft Electoral Roll ha ka 5 tarik Nailar, 2026. Lada don kino kino kiba ym shem ïa la ka kyrteng ha katei ka Draft Electoral Roll, ki lah ban phah ïa ki jingdawa ne jingujor naduh ka 5 tarik Nailar haduh ka 4 tarik Nailur, 2026. Ka jingbishar bad pynbeit ïa kine ki jingdawa bad jingujor kan long naduh ka 5 tarik Nailar haduh ka 3 tarik Risaw, 2026, bad yn pynmih ïa ka Final Electoral Roll ha ka 7 tarik Risaw, 2026.
Namarkata, ka Deputy Commissioner (Election), South West Khasi Hills District, ka kyrpad ïa baroh ki nongshong shnong bad ki nongthep vote kiba dei hok ba kin ai ka jingïatreilang kaba pura bad ka District Administration ryngkat bad ki Booth Level Officer (BLO) khnang ba ka jingpynlong ïa ka Special Intensive Revision (SIR) kan long kaba ïaid beit ïaid ryntih bad kaba jop.
Ka jingïatreilang jong ki paidbah ka long kaba donkam eh ban pynthikna ba ka Electoral Roll kan long kaba shai, kaba biang bad kaba thikna, kaba long ruh ka nongrim ban pynskhem ïa ka synshar paidbah.
