Kyrpad ka AMDA ban kyrshan ïa u Steve Jyrwa lyngba ka online voting ban poi phainal

Shillong, Nailur 8 : Hadien ba u samla Steve Jyrwa uba na ka jylla Meghalaya ula lah ban pynïapbiej ïa ki nongbishar ïa ka sap shad jong u ha ka jingiakob shad India’s Best Dancers kaba la long hapoh ka Ri mynta une u samla ula ïoh ban rung hapoh ka thup top 6 bad poi syndon sha ka Final.
Na ka liang ka seng kaba ju peit ïa ki nongshad napoh ka jylla ïa kaba la tip kum ka All Meghalaya Dancer’s Association lyngba U President u bah Kitbok Thabah ula ong ba kane ka long ka jingsarong ïa ka jylla baroh kawei lyngba ka jingwanrah nam jong u samla Steve da kaba ïoh ban rung syndon shaduh ka Top 6 jong kane ka jingïakob.
Ula pynkynmaw ruh kaba pynlong ïa ki khynnah samla Khasi ba kin ktik bad kyndeh ka mynsiem dei hadien ka jingïohi ïa ka lyer kaba la wan ha ki snem kiba la leit shadien ha kaba u Amit Paul uba dei u nongrwai ula pynkhih ïa ka jylla baroh kawei lyngba ki jingrwai jong u bad mynta ka kynti pat ka dei ka sien kaba nyngkong ba u samla Khasi un lah ban pynkhih biang ïa ka mynsiem jong ki briew ka jylla lyngba ka jingshad jong u.
Ha kaba ïadei bad kane ka sap bad ka jingïoh u samla Steve Jyrwa ban poi sha ka Final na ka liang u President ka AMDA ula pyntip ba dang ha kine ki khyndiat sngi ula dep ban phah da ka jingthoh sha ka sorkar ban kyntu na ka bynta ban ïarap ban bei pisa lem na ka bynta ka App kaba lah ban ai ka jingkyrshan ïa u samla Steve Jyrwa lyngba ka Online Voting lyngba ka Sony Liv.