Kyrmen u Myntri barim ba ka jingmang tyngka kan wanrah jingkylla ha nongkyngdong
![](https://mawphor.com/wp-content/uploads/2022/03/DSC_0724-scaled-1-750x430.jpg)
Shillong, Naitung 23: U Myntri barim ka Tnat Pule puthi bad MLA ka Amlarem Bah Lahkmen Rymbui, ula pynpaw ïa ka jingkyrmen ba ka mang tyngka 2024-25 jong ka ri kan wanrah ïa ka jingkylla kaba khraw ïa ki jaka nongkyndong bad kan plie lynti ban ïakhun ïa ka jingbym ïohkam ïohjam.
Ka Myntri Pla tyngka ka Ri Nirmala Sitharaman ka la wanrah ïa ka mang tyngka ba pura jong u snem mang tyngka 2024-25 hynne ka sngi Ba-ar kaba dei ruh ka mang tyngka ba 7 ba kan wanrah ma ka.
U Bah Lahkmen ula ong, “Ka mang tyngka ba la wanrah hynne ka sngi ka dei ka jingpynbteng ïa ki sien jam jong ka Sorkar India bad u Myntri Rangbah Duh ha kine ki shiphew snem ba la leit bad thmu ban kyntiew ïa ka ri baroh kawei”.
“Watla ka mang tyngka kan nym pynhun ïa baroh, ka mat ba sngewkhia eh ki briew ka dei ka jingbym ïohkam ïohjam. Da ki sienjam bapher bapher jong ka Sorkar, khamtam ban wanrah ïa ki jingtei bapher bapher, nga kyrmen ba kane kan plie lynti ïa ki samla la ka dei ha ka ïohkam iohjam ne ha kano kano ka dur,” ula ong.
U Bah Lahkmen ula kren halor ka jingpynheh ïa ka jingpynlut ha ka Mahatma Gandhi National Rural Employment Guarantee Act (MGNREGA), bad ong ba ka dei ka budlum ki kam pynroi ha ki shnong ki thaw.
U la pynpaw ïa ka jingkyrmen ba kane ka jingpynheh ïa ka mang tyngka kan lam sha ka jingkylla dur kaba shisha jong ha ki shnong nongkyndong.
Halor ka mang tyngka sha ka pule puthi, u Bah Lahkmen ula kdew ba ka dei ka jingpynkiew khyndiat ïa ka mang pisa bad banjur ïa ka jingdonkam ban ai kham bun ka jingkyrshan na ka Sorkar Pdeng.
“Ka pule dangle ka don ha ka khep ki jingkylla da ka jingpyntreikam ïa ka New Education Policy (NEP) ha kine ki saw snem ba la leit. Ki don shibun kiei kiei ha ka kam pule dangle kiba ka Sorkar Jylla ki donkam ïa ka jingïarap ka Sorkar Pdeng ban leh eiei ïa ki,” ula bynrap.
U Bah Lahkmen ula pynpaw ruh ia ka jingsngewkhia halor ka thain Shatei Lam Mihngi,haba kdew ia ka jingbym don ka jingbatai shai ha ka mang tyngka.
“Ngi donkam shibun ki lad ai jingsumar, shibun ki jingdonkam ha ki jaka pule, ka song pisa sha ki nongseng kam bad ban pynshlur ïa ki karkhana trai shnong ba kin pynkylla dur ïa ka thaiñ,” ula ong.