Nongstoiñ, Rymphang, 12: Ki nongïalam seng saiñpyrthei jong ki saw tylli ki party ka Nongstoiñ, kata ka NPP, Congress, Trinamool Congress bad Voice of People Party, ha ka sngi saitjaiñ ki la ïeng ïalap elekshon ha ka rynsan ïeng lang ïa kaba la pynlong hakhmat jong ka iew Nongstoiñ West Khasi Hills District.
Ha katei ka jingïalang paidbah kaba la pynlong ha ka Market Complex New Nongstoiñ, na ka liang ka seng u Prah lane VPP la don u bah Bobby B Kharshandi kyrtong MLA, bah T.H.S Bonney uwei na ki nongkitkam jong ka seng u ba dei u ophisar sorkar ba la shongthait, u ba la ju ïeng teng ruh kum u kyrtong MP ha ki por mynshuwa.
Haba ai jingkren na ka liang u Kyrtong u la ong ba ki paidbah ki dei ban kyndit thïah bad phai sha ka VPP, kaba don ha ka ïa ki nongïalam kiba ïohi jngai na ka bynta ka ri bad ka jaidbynriew. U la khot la wer sha baroh ki paidbah ban ai jingkyrshan ïa ka VPP lyngba ka symbol jong u prah, na ka bynta ka pateng ban wan. Ka lah dei ka por ban seng thymmai bad ban pynwandur thymmai ïa ka kam synshar ha ka konstitwensi bad ha ka jylla hi baroh kawei, ong u Bah Bobby.
Na ka liang jong ka seng Congress, u bah Bormanding Nonglang President ka District Congress Committee West Khasi Hills District u la ai jingkren ha katei ka sngi. Na ka lang u Bah Bormanding Nonglang u la ong ba u bah Prestone Tyngsong u wan ha Rambrai bad u la pynbna lypa ba ka NPP ka lah jop haduh 33 seat khlem pat thep vote.
U la ong ba kane ka jingkam lypa jong u, u nang mut ba ki paidbah ka West Khasi Hills District ki dei ki biej ban shu ngop beit ha ka NPP. Hynrei, ki paidbah ka West Khasi Hills ki dei kiba stad bad ki la dep ïohi kaba kum kano kane ka party NPP bad kumno ki MLA kiba don ha ka ki long bad ki treikam. Ki paidbah hi wat ïa kito kiba lah jop lypa ruh kin ym leit thep shuh. Na ka liang jong u Bah Bor u la ong ba ka bha ba ki paidbah kin phai sha ka Congress bad thep ha ka symbol jong ka Kti namar dei tang ka Congress ka ba lah ban ai jingshakri kaba hun sha baroh.
“Ki trok ki ïaid tang jong ki high level, nalor nangta man la ki kam ki leh trai bad hap ban ïoh jingbit na ki da kwah trei kwah bylla. Kynmaw ko ki paidbah lada ngi dang ailad biang ïa ka NPP, kan wan ka por wat ban leit die waidong ha ïew Nongstoiñ ruh hap ïoh jingbit na ki high level”, u la ong bad bynrap, “Ka sorkar MDA ka la synshar donbor bad lada ki paidbah ki mynjur, ngin ai jingsneng ïa kane ka sorkar kaba la lamkhmat da ka NPP. Tang ka congress kaba don ïa ka bor ban ai jingsneng ïa ka NPP bad ïa kane ngin sa pynshisha ha ka 2 tarik u Lber 2023”, u la ong shuh shuh.
Na ka liang ka party kot lane NPP lyngba ki nongkren ka la ong ba ka kyntien High Level ka dei ba la wanrah na Ri thor jong ka Ri India da ka seng Congress. Namar kitei ki jaidbynriew heh paid ki ju don da ki kyrdan bapher bapher ban ym shah ïa kino kino jaid poh ha ka imlang sahlang ban ïashimbynta lang ha kino kino ki jingïalang bad ki. Kim ju shah ruh ban ktah ïa ka tyllong umdih umbam bad ki don la kajong ka tyllong u ba kyrpang bad kim lah ruh ban bam ïa kaei kaba kiba ki jaidpoh ki shet ki tiew.
“Ïa u dewiong ruh la plie mynta pynban ki nongshim kabu ki pynsngewthuh bakla bad lada don kiba kwah jingshai ki lah ban ïakynduh ne leit pan jingshai na u bah A.Syiem”, ong utei u rangbah bad bynrap, “Hynrei hadien ba ka ïingbishar ka la pule bnïah ïa ka jingïaleh mokotduma jong ka seng ki nongkhaïi dewiong na Nongstoiñ, ka la shah ban tih ne khaïi hynrei ryngkat ki kyndon da kaba btah ruh ba ka jingtih dewiong kam dei ban ktah ïa ka jingdonkam jong kiwei pat bad la donkam ban ïaleh laisen bad mynta la don kumba 4 ngut kiba la ïoh ïa ka”, u la ong.
Na ka liang u Bah Macmillan Kharbani kyrtong TMC, u la ong, “Baroh ki seng kiba don ha ka sorkar MDA kiba kynthup ïa ka seng HSPDP, seng UDP, seng PDF, NPP bad kiwei kiwei ki don hapoh ka shatri jong ka sorkar BJP lyngba ka NEDA. Ki paidbah ki la ngiah ïa kane ka sokar kaba dang shu dep. Kumta lada ki paidbah ki donkam ïa ka jingkylla, dei tang ka TMC kaba lah ban wanrah jingkylla namar phi la mad ïa kiwei pat”.
