Klang ki thylliej ding ha manla ki jaka ha West Khasi Hills, ap jingma ïa ki ïing briew

Nongstoiñ, Rymphang, 12: Ka jingthang pathar ïa ki lum bad ki khlaw ha kine ki sngi, ka jur haduh katta katta ha kaba la ïohi ba naduh dang step haduh janmiet, ka thylliej ding ka klang bad ka bam duh ïa u phlang ïap bad ki dieng kiba dang rit kat haduh ba ki lum ki la synlen lut.
Katei ka jingthang pathar ïa ki lum ka jia ha man la ki jaka ha West Khasi Hills District bad ka buh ha ka jingma kaba khraw ïa ki ïing ki sem jong ki nongshong shnong, khamtam ha kine ki sngi ba ka lyer ka jur bha, namar lada dei ki ïing ha ki nongkyndong ba ki kmie ki kpa bad ki khun kiba la heh kim don por ban sah ha ïing namar ki hap ban ïabeh ïa ki kam ki duk bad ka bylla ka sngi.
Katba ha ïing pat ki hap ban iehnoh tang ïa ki khun kiba dang kham rit, kumta lada jia ba ka ding ka pur sted kat haduh ban da poi ki briew ki ban ïarap ka long kaba ma ym tang ïa ka ïing hynrei wat ïa ki mynsiem briew ruh.
Kum ban pynkynmaw ba ha kine ki snem ba la dep ki la don shibun tylli ki ïing briew kiba na ki thaiñ Riangdo haduh ki thaiñ Nongstoiñ, ba ki nongshong shnong ki la duh noh ïa ki ïing ki sem na ka jingbam duh jong ka thylliej ding namar ka jingthang pathar jong ki briew ïa ki lum.
Ha kaba ïadei bad kane ka mat, ka la don kam shibun ba ki paitbah nongshong shnong kin pyrkhat bha, namar ban kynnoh ïa ki nongsynshar shnong, ki nongsynshar hima bad ïa ki ba halor ka aiñ, kam don jingmut lada ki paitbah nongshong shnong kim ïatreilang.
Ym lah ban len ruh ba baroh ki nongsynshar shnong, ki nongsynshsr hima bad ki bor ka aiñ ki la don la ki jong ki jong ki kyndon ban khang pyrshah ïa ka jingthang pathar ïa ki khlaw ki btap bad ki lum. Hynrei kim lah pat ban buh ïa ki nongphara, tangba lada ki paitbah ki ïatreilang ki dei ban shim khia dalade, khnang ban kan ym kem ding namar ha kine ki sngi ba ki phlang ki kynbat ki la tyrkhong bha tang shu dei phylliah ding ka la meh hi. Kumta ka jingshimkhia bad ka jingïatrei lang ka donkam haduh katta katta.