Kyrmen ka Congress ha Nongstoiñ ban poi sha ka thong

0

Nongstoiñ, K’lyngkot 30: Shi sngi hadien ba ki nongkyrshan ka Nongstoiñ Assembly Youth Congress National Congress ki la ïohi ha kawei na ki kot khubor ba u bah K.Kharbani President bad u bah S.I Sangrian Secretary, lem bad 30 ngut ki dkhot ki la leit ban pynïasoh sha ka National Peoples Party, na ka liang u bah B.Wahlang General Secretary ka Nongstoiñ Assembly Youth Congress ha u kyrwoh ba u la pyllait mynta ka sngi, u la ong ba u samla K.Kharbani bad u samla S.I.Sangriang, ki la dep mih noh na ka party naduh u snem ba la dep, hadien ba ka party ka la pynlong ïa ka jingïalang ban pynthymmai ïa ki nongkitkam bad na ka daw ba kim shym la shah jied shuh ki la mih noh na ka party.
U bah Wahlang u la ong ruh ba ka jingbym jied shuh ïa ki ka dei namar ba ka party baroh kawei kam shaniah shuh. Nalor kata u la ong ba ka jingmih noh jong ki kam don jingktah ei ei ruh em ïa ka party ha kane ka election ban wan bad haduh mynta ki nongkitkam ba thymmai jong ka party naduh ki Block Level, ki Primary Unit bad ki Sub unit ki trei shitom ban pynkhlaiñ ïa ka party. Katba nang mih ki sngi ka Congress ka nang ïoh mynsiem bad ka don ka jingkyrmen kaba skhem ba kan poi sha ka thong ha kane ka election ban wan, ong ka kyrwoh.

Leave A Reply

Your email address will not be published.