Shillong, Lber 17: Ka Seng Bharatiya Janata Party (BJP) Meghalaya, ka la pynpaw ba kam pat da don eh ka jingktah na ka jingbym pat pynbna ia ka kyrteng ki kyrtong na ka liang ka High Command na Delhi namar kumba ka long mynta ka dang ka por hynrei ki la angnud pat ba la kumno kumno na ka liang ka party Sengkmie kan dei ban pynbna noh mynta u taïew.
“Haoid ngi sngewthuh ba ka party ka la kham slem ban pynbna ïa ki kyrtong ki ban ïakhun ïa ka ilekshon Lok Sabha na Shillong bad Tura Parliamentary seat, hynrei kumba ka long mynta kam pat da ktah than eh ïa ngi kiba trei hapoh ka party namar ka por ka dang biang hynrei tang kawei kaba ngi kwah ban kyrpad ïa ka High Command ne ka BJP Sengkmie ba kan pynbna noh ha une u taïew,” ong u Bah M Kharkrang u Chief Spokesperson jong ka BJP Meghalaya.
Lah ban pynkynmaw ba na ka liang ka Election Commission of India (ECI) ha ka sngi Saitjaiñ, ka la pynbna ba ka jingïathep vote ha kine ki artylli ki constituency ka Jylla Meghalaya bad kiwei ki Jylla ka thaiñ Shatei Lam Mihngi, kan long ha ka 19 tarik ïaïong.
Ka BJP na Delhi, ka la dep ban pynbna ïa 267 ngut ki kyrtong ban ïakhun ïa ka ilekshon hynrei ka la buhteng ban pynbna ïa ki kyrtong ban ïakhun na Meghalaya.
Ka Party ka la phah haduh san tylli ki kyrteng jong ki kyrtong kiba kwah ban ïakhun na Shillong bad hynriew tylli na Tura constituency.
Kine ki san ngut ki dei u Myntri Sorkar jylla u Bah AL Hek, u President barim ka party u Bah Ernest Mawrie, ka Kong Fenela L Nonglait, Mewaker Lyngdoh bad Sumita Laloo.
Na Tura pat ki dei u MDC ba mynta ka Tura Bernard N Marak, Boston Marak, Riya Sangma, KC Boro, Winnerson D Sangma bad Thomas Sangma.
Ka BJP Meghalaya ka kyrmen skhem ba ka High Command kan pynbna noh kham kloi ïa ki kyrteng jong ki kyrtong.
Kumba long mynta, ki kyrtong kiba la pynbna ban ïakhun na Shillong seat ki dei u MP ba mynta ka Congress u Bah Vincent H Pala, ka Myntri Sorkar ka Kong Ampareen Lyngdoh na ka NPP, u Robertjune Kharjahrin na ka UDP, u Dr Ricky AJ Syngkon na ka VPP bad ki kyrtong shimet.
Na Tura, ka MP ba mynta ka Agatha K Sangma kan ïakhun na ka NPP, u MLA ka Congress Saleng A Sangma bad u Nongïalam ka TMC Zenith Sangma.
