Shillong, Nailar 16 : Ka kynhun jong ki hati khlaw ka la hiar thma bad pynjulor ïa ki ïing ki sem bad ki jingthung jingtep ha ka shnong Kurung, Pedaldoba, West Garo Hills ha ka step phyrngap 15 tarik, ki la kyrdem iap ruh ïa ka longkmie bad i khun shynrang ba dang san snem bad ïa uwei u rangbah.
Kane ka jingjia ka la jia ha ka por 2 baje ei ei mynstep ha kaba katei kynhun ki hati khlaw kala wan rung ha katei ka shnong ban wan wad jingbam. Ki nongshong shnong mar ïa ïoh sngew ïaka jingwan hiar thma kitei ki hati ki la mih bak na la ki ïing ki sem bad phet rieh sha khlaw bad dei ha kum katei ka por ba kine ki hati khlaw ki la ïohi bad kthong ïa kine ki trai shnong. Ki la ïoh ban kyrdem iap ïa ka kmit ka Sarati Lama ba 32 snem ka rta bad ia u k hun shynrang ba dang 5 snem u Suchit Biswakarma. Nalor kane ki la ïoh ruh ban kyrdem iap sa ïa uwei u rangbah uba 40 snem ka rta u Bhim Bh Roi ha katei hi ka shnong.
Kane ka shnong ka long hajan khappud bad ka Assam bad na ka por sha ka por kine ki hati khlaw ki ju wan rung bad wan ïaid lynti beit na katei ka shnong. Ha ka jingshisha ka tnad kam khlaw kala buh ïa ki briew jongka bad ïa ki bor pulit ruh ban peitngor ïa ka ïaid ka ïeng ki hati khlaw hynrei ym tip ha kano ka rukom ki khlem lap ba ïoh jingtip ki la ïoh ban leit rung sha katei ka shnong bad leh ïa katei ka kam pynjulor bad pyniap briew.
