Kyntu u nongïalam ka HITO ban shakri na bynta ka pateng ka Jaidbynriew ym tang na bynta ka mynta

Nongpoh, Naitung 29: Kum u nongïalam ba rangbah ka Hito ha Ri Bhoi District, u Bah Shaniah Nongrum, haba leit ban pynskhem ïa ki nongïalam ka HITO Dulongnar Unit ha ka sngi Saitjaiñ, u la ong ba kum ki shipai ka seng HITO ngi mih madan ym tang ban shakri ïa ka mynta, hynrei ngi long kum kita ki shipai ka seng ka long ban shakri na ka bynta ka pateng ka jaid bynriew.
Haba kren ïa kitei ki kyntien, ka jingthmu ka long ba man la uwei pa uwei u dkhot ka jaid bynriew, haba u wan ban pynïasoh sha ka seng HITO, ka jingthmu ka long ban shakri ne len lade ym tang na ka bynta jong ka imlang ka sahlang, hynrei kaba kham kongsan ka long ba ngi hap ban ïa khun pyrshah na ka bynta ka pateng jong ka jaid bynriew.
“Kum ki nongïalam ka seng, lada ngim lah ban ieng ban ïaleh na ka jingwan ki bor ba na shabar ban thombor ïa ka jaid bynriew jongngi, ka long ka jingma kaba khraw na ka bynta ka pateng jong jaid bynriew jong ngi” ong u Bah Shaniah Nongrum.
Namarkata, u la kyntu ïa kine ki nongïalam ba thymmai ka seng ba kin shim ïa kata ka jingkitkhlieh na ka bynta ban ai ka jingïada ïa la ka jaid bynriew bad kumba ka seng HITO tang ha ka rta kaba 3 snem ei ei ka la leh shibun ki mat ki jura kiba ai jingmyntoi ïa ki paidbah ka jylla, u la bynra.
Ki nongïalam ka HITO Dulongnar Unit ba la pynkshem ha ka sngi saitjain ki kynthup ïa u President u Kitboklang Ïangngap, Vice president Fairborn Ïangngap, Working President Bashan Maiong, General Secretary Lucky Shylla, Assistant Secretary Pyndapjingkmen Lyngkhoi bad kynthup 30 ngut ki dkhot jong kane ka Unit. Ha kane ka sngi la sakhi lang ruh da ka jingdon lang u Marius Malai, General Secretary ka HITO Ri Bhoi bad kynthup kiwei kiwei ki nongïalam.