Tura, Kyllalyngkot 3 : U Lat ka jylla u Brigadier (Dr) B.D Mishra (Rtd) u la kyntu jur ïa ki ophisar ba kin shakri hok na ka bynta ka jingmyntoi ki paidbah ka jylla. ïa kane ula kren ha ki ophisar ha ka jingïalang ba u la lum kyrpang ïa baroh ki ophisar jong ki tnad sorkar bapher bapher ha nongbah Tura kum ka jingbud dien bad ïamir jingmut bad ki halor ka rukom pyntreikam ïa ki skhim bapher bapher mynta ka 3 tarik Kyllalyngkot 2023.
ïa kane ka jingïalang la pynlong ha Circuit House Tura. Ha kane ka jingïalang u Lat ha kaba nyngkong eh u la ai khublei snem thymmai ïa baroh ki ophisar da kaba u la kren ïaroh ruh ïa ka bynta kaba kum ki ophisar ki don ban trei bad bah ha ka jingtreikam jongki ban kyntiew ïa ka roi ka par bad ka ïoh ka kot jongka jylla. U la ong dei ban trei da ka mynsiem aiti lut bad da kaba khuid bad ba hok.
Halor ka jinghiar ki jingmih ki mar ha ka jylla kum ki jhur, ka doh bad kiwei kiwei ki mar , u la ban jur ïa baroh ki ophisar kiba trei ha ki district ba kin ïatrei lang ban kyntiew ïa kane ka jingpynmih ïa ki mar bam mardih bad kiwei kiwei ki jait mar ruh ha ka jylla khamtam eh ha ri lum Garo.
Ha kane ka sngi ula ïa kynduh ruh ïa ki MDC jongka Garo Hills Autonomous District Council (GHADC) bad ha kane ka jingïakynduh u la ai burom ïaki ba ki long ki nongïada bad pynneh pynsah ïa ki riti ki dustur, ka jinglong tynrai ba kyrpang jongka jaidbynriew Garo. U la kyntu ïa ki ba kin pyndonkam 100% ka pisa kaba la mang na ka bynta ka jingmyntoi ki paidbah ym ban pyntrei tangdep ïa kino kino ki porjek.
Na ka liang u DC jongka West Garo Hills u Swapnil Tembe ula ai ka kaiphod lyngkot halor ka jinglong jingman jongka District bad kiei kiba la lah ban leh bad pyndep tad haduh mynta.
Shwa ïa kane u Lat u la leit ruh ban plie ïa ka hostel ki samla pule kynthei ha NEHU Tura Campus, u la leit jurip ruh ïa ka ïing sah u Lat ha Tura kaba ka jingtei ka dang ïaid shakhmat mynta.
Kiba la ïadonlang ha kane ka jingïalang ki long u CEM u Albinush R Marak, ki EM ka GHADC, SP u V.S Rathore, bad kiwei kiwei ki ophisar.
