Kyntu ki rangbah ka shnong Seiñduli ïa ki paitbah ban kiar na ka jingwiang ding pathar

Nongstoiñ Rymphang 29: Ka aïom tlang ka la sdang ha man la ki jaka ki lum ki la sdang ban kum da ka rong ïong namar ki riew shim kabu ki la sdang ban wiang ding pathar kat haba lap ha kaba katei ka jing wiang ding pathar ka buh ha ka jingma ïa ki ing ki sem kiba doh ha rud shnong ha ki jaka ba kham pajih na surok.
Ha kaba ïadei bad katei ka jingwiang ding pathar u bah Pherikstone .Lyngdoh Marshilong uwei na ki riew rangbah na ka thaiñ Seiñduli haba ïa kren bad u nongthohkhubor u la ong ba man la u snem da ki ju don ki jingpluh ïng ha kylleng ki shnong na ka daw jong ka jingpur ding haduh ba ki la don ki ïing ki sem jong ki nongshong shnong kiba la shah bam duh ha ka thylliej ding na ka jingthang pathar jong ki riew shim kabu.
U la ong ruh ba ka shem jingeh pat ban lap ïa kitei ki briew kiba mlien ban wiang ding ïa ki lum bad ki khlaw namar shuwa ba kin sei jigpruid kid a peit bha ha baroh saw dong ïoh don ki briew kiba ïohi .
U la ong ruh ba ka jingwiang ding pathar ka wanrah ruh ïa ka jingtyrkhong ka khyndew namar haba la hap slap ka kum ka kit lut ïa ka sboh.
U bah Lyngdoh u la ong ruh ba shisien ba ki lum bad ki khlaw ki la shah wiang ding ki dieng ba bun jait kiba dang sdang ban mih bad khie lung ki ing lut khait bad ki jaka ki kylla synlen.
Ha kajuh ka por u la ong ba lada ïad lyngba ki jaka ba bun ki diengkseh ha kine ki sngi lah ban ïohi da ki phew hjar ki dieng kiba dang rit kiba jrong tang kumba hynriew haduh shiphew inshi bad tang shu wiang ding baroh ki ïap lut khoit.
U la ong ruh ba lada peit nuksa ha shilynter ka surok bah National Highway Shillong Tura ha ki jaka ym pluh ding da ki hajar ki ding lieng bad ki dieng kseh ki mih bad ki san bha katba ha ki jaka ba ka ding ka poi ki lum ki synlen lut.
U bah Lyngdoh u la ong ruh ba halor ka jingwiang ding pathar wat ki bor sorkar ruh ki pyrkhing bha hynrei haduh mynta ym pat ju ïoh sngew ba ki ba don kti ha kaba thang pathar ïa ki lum ki shah kem ha ki bor ka aiñ namar ba ym ju don ba lap ïa ki.
Halor katei ka mat u la ong ba ka por ka la dei ba ki rangbah shnong , ki bor ka aiñ bad ki paitbah ki la dei ban ïatrei lang bad ban pynlong ruh da ki prokram bapher ba pher ban pynsgewthuh ba ka jingthang pathar ïa ki lum ,ki khlaw ki btap ka dei ka kam kaba long pyrshah ïa ka mariang bad k imlang sah lang.
Ha kajuh ka por u la ong ba lada ki paitbah ki nang ban tyngkai ia ki lum bad ki khlaw ki btap kan long ka jingkyrkhu kaba khraw ym tang ia u khunbynriew hynrei ïa kiwei pat ki jingthaw ba im kum ki sim ki doh ki khñiang ki ksiah bad k mrad ki mreng kiba pynsngewtynnad lyngba ki sur ba ki pah ha ka por mynsngi bad mynmiet.
U la ong ruh ba kaba kham kongsan eh ka long ba ka jingdon jong ki dieng ba bun jait ka pyntngen ïan ka khyndew bad ka pynneh ïa ki tyllong um hynrei lada ki lum ki synlen bad ym don ki dieng wat ki wah duid ruh ki rngad noh ha ka por tlang.
Khatduh eh u la kyntu ïa kito kiba ju mlien ban wiang ding pathar ha ki lum ba kin sangeh noh bad ki pyrkhat bha namar tang da iwei i kyndok jingpruid ka la pynjot lut ïa ki lum ki wah bad ka buh ïa ka lawei ha ka jingma.