Shillong, Ïaïong 30: Katkum ka kyrwoh ba la phah da ki bor pynïaid district jong ka East Khasi Hills, la pynmih ïa ka jingbthah ïa ki paidbah ïa ka jingwan ka lyiur haba kyntu ba kin long kiba phikir haba jur slap, jur lyer bad ka jinglah ban wan ka jingshlei um.
Ha ka kyrwoh la ong, “Namar ba kan sa wan ka Aïom Lyiur kaba lah ban mih ka jingther u lapbah lapsan, ka jingjur jong ka lyer bad ka jingshlei um, kumta la ai ka jingbthah ïa ki paidbah.”
La bthah ïa ki nongshong shnong ban pynthikna ban buh bha ïa ki tiar kiba donkam ki tin, ki mawit, ki jaka bret ñuit, ki jingthoh ne sign boards bad kiwei kiwei kiba lah ban shah rah noh ha ka lyer kaba jur.
Katkum ka kyrwoh na ka liang ka Deputy Commissioner jong ka East Khasi Hills la bthah ruh ban long kiba husiar ha kaba ïadei bad ki tiar bording. “Dei ban pynlip ïa baroh ki tiar kiba pyndonkam da ka bording, kum ka isteri, mobile charger, ka TV (Television) bad kiwei kiwei lada don ka jingpom pyrthat,” pynkut ka kyrwoh khubor.
Lah ruh ban ong ba ka Meghalaya kadei kaba la khmih lynti ba kan jur slap bad kumta ka DC ka la maham ruh ha kaba ïadei bad ka jingma ha kaba ïadei bad ki um ki wah. “La kyntu ïa ki paidbah ba ki dei ban husiar bad phikir bha ha ka por ba ther u lapbah lapsan namar ba ka lah ban don ka jingshlei um khamtam eh ha ki jaka kiba don hajan ki wahduid bad ki wah”.
Shuh shuh la bthah ïa ki paidbah ba kim dei ban leit tur shajan ki um ne ban ïaid lyngba ki um kiba tuid bad ban kiar ban leit sha ki wahduid ne wah, ki nala, ki kshaid bad kiwei kiwei, ka jingkhlaiñ bor jong ka um ka lah ban long kaba jylliew bad ka um ka lah ban pynkyllon ïa ki kjat bad rah. Nalor kane ka la pynpaw ruh ba, “Ym dei ban leit sha ki jaka wahduid, wah ne kshaid bad kiwei kiwei ki jaka kiba don jingma.”
La bthah ba ki nongñiah ïa ki thuk thuk bad kiba ïaid kjat la bthah ba kim dei ban leit sha ki jaka kiba don jingma ha ka por ba don ka jingslap. “Wat nym ñiah na ki jaka kiba don ka jingshlei um bad ban kiar na ka leit sha ki jaka kiba don ki post elektrik ne ki waïar bording ban lait na ka jingshah lympat ha ka bording elektrik”.
Ha kaba ïadei bad kano kano ka jingdonkam jingïarap haba wan lynshop ka bor mariang, ki paidbah ki lah ban phone ha u 112 ban ïoh ïa ka jingkyrshan haba wan lynshop ka bor mariang.
Shuh shuh la bthah ïa ki paitbah ba kin long kiba husiar bad ban shim ïa ki lad jingïada ban pynthikna ba ïoh ïa ka jingshngaiñ ha katei ka por.
