Kyntu ka MDC na Narpuh ban buh ïaka tnad Revenue ha Khliehriat ban khamsuk kiba apply LHC

Jowai, Lber 27: Ban kham pynsuk ki paidbah ka East Jaiñtia Hills District ban ïaleh ïaki kot Land Holding Certificate (LHC) na ka bynta ki jaka puta, ka kong Deivipaia T. Tongper kaba dei ka MDC na Narpuh kala dawa na ka Executive Committee jong ka District Council ba kan buh ïa ka tnad treikam Revenue hapoh Khleihriat.
Kala ong na ka por sha ka por ka buh jingeh ïa ki paidbah na East Jaiñtia Hills ban leit mih shaduh Jowai, kaba la ktah ïa ka por jong ki wat kiba bun ki briew kila thait ban leit leh ïaki LHC nalor sa ka jingslem ban pynïoh ïa ki kot LHC kaba shim por da ki bun bun bnai.
Kala ong ruh ba ka Council kala dei ban pynbeit bad pyndonkam ïa ka bor haka rukom pynrung kam khambun ïa ki trai jylla haki Karkhana Dewbilat kiba don hapoh ka East Jaiñtia. Kumba long mynta ki don haduh 90% ki kam la trei da ki bar jylla.
Kala kren ruh halor ka jingeh ki nongrep trai jylla, namar ka jingïoh lad ki bar jylla na Kalain (Assam) ban wan pynpoi ïa ki mar rep jong ki shapoh ka kane ka thaiñ East Jaiñtia bad kane kala ktah nyngkong ïa ki trai jylla kiba rep ïa u kwai bad tympew kiba shem jingeh bha na ka jingshah khñiot dor ha ki briew ba nabar.
Kumba long mynta kala ong ba ka kam jngohkai pyrthei hapoh ka Elaka Narpuh ka long kaba riewspah bha da ka jingdon ki jaka ba itynnad kum ha ka shnong Sunapyrdi, Shymplong bad Borsora. Kumta ka kyntu ïaka Council lyngba ka Mang Tyngka ba kan peit ïa kane ka jingdonkam ha katei ka thaiñ.
Ha ka jingïadei bad ka jingpynmih tdem pum pum jong ki Cement Plant kaba la ktah bha ïa ki nongshnong shnong kum ka Lumshnong, Chiehruphi, Thangskai Wahiajer bad kiwei de ki shnong ba marjan ,ka kong Deivipaia ka kyntu ïa Council ba kan bthah ïa kitei ki Cement Plant ban kin shna bha ïa ki Treatment Plant khnang ban lait na ki pum pum jakhlia.