Khliehriat Risaw 19: Ka Khasi Students Union East Jaiñtia Hills District ka pynpaw ka jingsngew khia halor ka jingshah kyntiat ki khynnah samla kiba leit ban thep kam ha ka tnat Civil Defence & Home Guard kaba la jia myn ha ka 14 tarik mynta u bnai, halor kane ki nongïalam ka seng ki la leit ban ïakynduh ïa u Deputy Commissioner ka East Jaiñtia Hills District bad kyntu ïa u ba un sngewbha ban tuklar lem halor kane.
Katkum ka shithi sha u Deputy Commissioner ba la buh da ka seng myn ha ka 15 tarik mynta u bnai, ba la soi da u Assistant General Secretary u samla Pynshaikupar Dkhar bad u Organising Secretary, u samla Deiniwan Lyngdoh, ka seng ka pylaw ruh ba ïa ka jinglait kam ha katei ka tnat Home Guard ym shym la pynbna (advertise) eiei ha ki kotkhubor bad kane ka pyni ïa ka jingdkhoh ka rukom treikam jong ka tnat Civil Defence & Home Guard bad kane ka jingleh ka pynduh mynsiem ïa ki samla wad kam, na kata ka daw ki hap ban wad ki lad ki lynti ban phah tuklar lem ha ki bor ba halor.
Ka seng ka kyntu ïa u Deputy Commissioner ba un sngewbha ban tuklar lem halor kane ba ka rukom thungkam kan long kaba khuid ba suba ha kaba ïadei bad kane ka post ha katei ka tnat.
