Jowai, Ïaïong 30: Ka Khasi Jaiñtia Youth & Students Union (KJYSU) lyngba ka kyrwoh bala phah da u ban Chemi Phawa President Rangbah ka seng ula kyntu ïa ka sorkar MDA-II ba lamkhmat daka NPP ban pynduh pyndam noh shisyndon ka jingtah ne kah ïit ïong ha ki kali paitbah.
Kat kum ka jingtip jong ka seng la ong baka sorkar ka la pynmih hukum ban nym shah shuh ïa ki kali paitbah ban tah ne kah ïit ïong ha ki kali jong ki da kaba aidaw ba kane ka lah ban mih ne kharoi shibun ki kam be-aiñ ne kam sniew hapoh jong kine ki ïit ïong ha kaba ki riew bymman ki lah ban leh kum ka ïadih kyiad, dih kanja, dih drugs ïa kai kynthei bad kiwei kiwei de ki kam sniew kam awria.
Hynrei ha ka jinglap jong ka seng mynta te ki don shibun bah ki kali kiba tah ne kah ïit ïong khamtam lei kito ki kali kiba kham rem dor ne kham standard kum ki Breeza, Grand Vitara, Baleno, Bolero, Scorpio, Fortuner bad kiwei kiwei. Bad ki bor jong ka aiñ kim pyrkhing ne leh ei ei ïa ki wat lada ki long ki kali paitbah ne riew shimet ruh. Hynrei ïa ki kali tad dor kum ki Car, Alto pat te kim shah bad ki pyrkhing bha.
Kumta ka seng ka buh jingkylli, Hato kita ki kam sniew ki lah ban jia tang hapoh ïit ïong jong ki kali tad dor ne ki Car ki Alto? bad kim jia hapoh ki ïit ïong jong ki kali rem dor kum yaki Thar ki Bolero ne ki Fortuner?
Lada kine ki kam sniew ki lah ban jia ha kino kino ki kali ïit ïong te ka sorkar ka dei ban shim khia.
Ka seng ka ong kane ka jingai lad ban tah ne kah ïit ïong tang ïa ki kali rem dor ka pynpaw ruh ïa ka jingleh shilang khmat ne ka jingarsap. Kaba pyni ïa ki ba riewspah bad kiba don ba em te ki lah ban leh katba ki mon hynrei ïa ki rit ki ria pat ki ïuh ki kyrdem kum ïa u phlang u kynbat. Bad kane ka pynkheiñ ruh ïa ka hok longbriew manbriew kaba long salonsar kumba la thoh ha ka riti synchar jong ka ri India.
Kumta ka seng ka kyntu ïa ka sorkar bad ïa ki bor jong ka aiñ ban shimkhia ban khang noh shi syndon ïa kane ka kam bad ka sorkar ka dei ban aibor tang ïa kito kiba dei hok ban pyndonkam ïa ki ïit ïong. Bad lada ka sorkar kam lah ban khang te ka dei ban ailad lang salonsar ïa baroh kumba la pynkub bor daka riti synshar bangi long mar kat juh hakhmat ka aiñ.
Ïa kane ka kyrwoh la phah da u Bah Chemi Phawa President Rangbah bad Bah D. Shullet General Secretary.
