Kyntu ka JNC ïa u DM&HO ban pynbha ïa ka Blood Transfusion Services ha Khliehriat Civil Hospital

Khliehriat, Lber, 29: Ka Jaiñtia National Council (JNC) Khliehriat Circle hadien ba ki la ïoh ka jingujor na ki paidbah halor ka jingdkhoh ka rukom treikam ka Clinical Laboratory bad ka Blood Transfusion Services ha Khliehriat Civil Hospital kaba la buh jingeh ïa ki paidbah kiba leit shim dawai bad leit shah sumar ha ka hospital, ka seng hapoh ka jingïalam u President u Bah Shanborlang Bamon ha ka sngi Thohdidng ki la la leit ban ïakynduh ïa u District Medical & Health Officer (DM&HO) East Jaiñtia Hills District u Dr D.Shylla bad aiti ruh da ka dorkhas.
Ha ka jingthoh ka JNC ka la kyntu ïa ka ophis jong u DM&HO ban pynbiang ïa ka Clinical Laboratory bad ka Blood Transfusion Services khnang ba kan ym buh jingeh than ïa ki paidbah kiba leit sumar ha hospital.
“Ki jaka ai jingsumar ki donkam ban long kiba bit ba biang bha lada donkam ki jingsumar kiba kyrkieh ne ki kum ki Emergency Surgical Cases bad kiwei kiwei ki jingsumar ba kyrkieh,hynrei bunsien kim ju lah ban leh ïa ki kam ha ka por kaba biang bad ki ju phah pynban ïa ki nongpang sha kiwei pat ki jaka ai jingsumar kiba sha jngai bad kaba buh jingma ïa ka jingim jong uba pang ba shitom,” pynpaw ka JNC.
“Kane ka jingbym biang ki Clinical Laboratory cum Blood Transfusion Services ha Khliehriat Civil Hospital ka dei kaba ka seng ka sngewkhia haduh katta katta namar ka shim ïa ka por ban lap ïa ki jingshitom bad ban ai ki jingsumar bad ka jingshitom jong u nongpang ruh ka nang heh bad buh jingeh ïa kiwei pat ki jaka ai jingsumar ki ban ai jingsumar hadien bad lada lah ban pynbiang bha ïa ka ki clinical laboratory cum blood transfusion services ka hospital ruh kan kiew bad kan long ka lad jingiarap bad iada ïa ki briew kiba pang ba shitom ha ka por kaba biang,” la bynrap ka seng.