Shillong, Naitung 13 : U Myntri Rangbah ka Jylla Conrad K Sangma, ula phah da ka jingthoh sha u Myntri ka Tnad Pule Puthi ka Sorkar Pdeng u Dharmendra Pradhan, ban kyrpad ïa u ban tuklar bad pynrung lang ïa ka Ktien Khasi bad Garo nalor ka Alternative English ha ka eksamin National Common Entrance Test (NCET).
U Myntri Rangbah ka Jylla ula pyntip ba ki samla pule ka Jylla kin nym lah satia ban ïakhun ïa ka eksamin jong ka Language 2 jong ka kyndon I (33) language namar ym shym la kynthup lang ban ai jied ïa ki Ktien ki Thylliej jong ka Jylla kat kum ka thup ha ka kyndon I Language jong ka National Test Agency (NTA).
“Kane ka la wanrah ïa ka jingbym sngewhun hapdeng ki samla pule, ki Kmie Kpa bad ki Jaka pule jong ka Jylla” ong u Myntri Rangbah ka Jylla.
Ha ka shithi, u Conrad ula kyrpad ïa u Myntri ka Sorkar Pdeng ban bthah ïa ka National Council for Teachers Education (NCTE) ba kan pynrung lang ïa ka ktien Khasi, Garo bad Alternative English ha ka thup khnang ba ki samla pule kin ïoh ka lad ban jied ïa kine ki Ktien bad ba kin ym duh ïa la ka hok bad ka kabu.
Haba pynpaw ba kane ka kam ka dei kaba sngewkhia jur bha, u Conrad ula ong ba kane ka dei kaba ïadei bad ka National Common Entrance Test (NCET) na ka bynta ka Integrated Teachers Education Programme (ITEP) ka ban pynlong da ka National Test Agency (NTA) kat kum ka Notice ba pynmih ha ka 2 tarik Jylliew, 2023.
U Myntri Rangbah ula thoh ïa kane ka shithi halor ka shithi jong ka Tnad Pule Puthi ka Jylla ba 30//2023 bad 10/7/2023 ba la pyntip sha ka National Council for Teachers Education (NCTE).
