Kyntait u Mondal ïa ka jingdawa ban thung tohkit ba pynkiew dor ïa ka Ganol Project

Shillong, Naitung 03: U Myntri ka tnat Bording ka sorkar jylla u AT Mondal u la kyntait ïa ka jingdawa ban thung da ka jingtohkit ba laitluid halor ka jingkynnoh ba la pynkiew dor shaba palat na ka bynta ban pyntreikam ïa ka 22.5-megawatt Ganol Small Hydro Project.
U Nongialam ka Liang pyrshah u Mukul Sangma, u la kyrpad ban thung da ka jingtohkit da kaba ong ba ka sorkar pynbeit biang ïa ka dor jong ka project cost lah bun sien ha kaba ka la lam sha ka jingkiew ka dor shaba palat kaba na ka T. 356.43 sha ka T. 590.88 klur, hynrei na ka liang u Mondal u la kyntait ïa kane ka jingkyrpad.
Haba kren sha ki lad pathai khubor ha ka sngi Palei, u Mondal u la ong ba ka jingpynkiew ïa ka dor kam dei kaba long barabor na ka bynta ki hydro power project, bad ïa ki dor la dep ban khmih bniah bha da ka IIT Guwahati bad ba la audit da ka kynhun ki nongbishar na ka ophis Accountant General (AG).
Ka kynhun Myntri ka la shim ka rai ban pynkutnoh ïa jingshim rai halor ka jingpynkiew dor ïa kane ka project, da kaba pyrkhat ïa ka jinglong jingman ka jingring bording bad kumjuh ruh ki kam ba lawei jong ka tnat.
“Kham bun na ki jingpynkiew ïa ka dor ka don bad kaei ka dor kaba la dep ban leh, la phah bad la khmih bniah da ka IIT Guwahati. Ka kynhun ki nongbishar hapoh ka ophis Accountant General ki la audit ïa baroh ka jinglut bad dei halor kane ba ka kynhun myntri ka la rai ban khang noh ha katei ka jinglut jong ka Ganol project naba mynta ka la pynmih bad ring ïa ka bording. Lada ngi sdien sah, kiwei pat ki kam kin lah ban wan lang kumjuh, kumta la dep ban khang noh ha kane ka jingpynlut. Kumta kine ki kam ki don hangne,” ïathuh u Myntri.
Halor ki daw ba sha lyndet jong kane ka jingpynkiew dor, u Mondal u la ong ba dei na ki jingpynkylla ïa ka design jong ka project. Ha kaba sdang ïa ka project la pyrkhat da ka surface-type channel ne nalor khyndew, hynrei ka CWC kham hadien ka la mynjur da ka underground tunnel ne ban pyntuid ïa ka um napoh khyndew. Kane ka jingpynkylla ka la lam sha ka jingkiew ka dor ba kynthup ruh ïa kito kiba ïadei bad ka kam khyndew (geological).
“Kham ha shwa la rai ban leit da ka surface type of channel ban pynïaid ïa ka um sha ki turbine, bad hadien pat ka CWC ka la ïathuh ba dei ban leit noh da kaba pynïaid ïa ka um napoh khyndew. Kumta lada phi leit da kaba napoh ka khyndew kin lah ban mih ki jingkylla ha ka jinglong ka khyndew,” u la bynrap.
Haba kylli halor ka jinglah ban ïoh ïa ka kot kaba shai halor kane ka kam, u Mondal u la ong ba kam don kano kano kaba la buhrieh, naba ka jingpynkiew ïa ka dor jong ka project lah dep ban bishar bad audit bha bin pa bin.