Kyntait u Bah Ardent ban long dkhot ha ka komiti ïatai Roster, yn bteng beit ban shah thngan

By Mawphor Editor On May 28, 2023

Shillong, Jymmang 27: Ka sorkar jylla ha ka sngi Thohdieng ka la pynmih ïa ka jingpynbna ba ka la thaw ïa committee ba kynthup ïa ki 12 ngut ki dkhot na bynta ban ïatai ïa ka Roster System system ha kaba u Bah Ardent u la long uwei na ki dkhot hynrei jong kane ka komiti ba la khlieh da ka Kong Ampareen Lyngdoh hynrei na ka liang u President ka VPP u la kyntait ban long dkhot ban ban shim bynta ha kino kino ki jingïalang kane ka komiti.
Haba ïakren bad u General Secretary ka VPP u Dr Ricky AJ Syngkon u la ïathuh ba na ka liang u Bah Ardent bad ka VPP hi ki la kyntait ïa kane ka jingtyrwa ka sorkar namar kam sngew don jingmut satia ban ïatai halor ka Roster System khlem da ktah lang ïa ka Reservation Policy.
“U President u la kyntait ban pdiang ïa kane namar kam don jingmut satia ban ïakren ïa ka Roster bad lehse phi la ban pyrkhat balei ngim pdiang ïoh lehse ngi lah ban kren ïa kane ka mat namar ka Roster System bad ka Reservation Policy ki don ka jingïadei bym lah pynkhlad, hynrei dei namar ngi la mad ïa kane ha ka All Party Meeting ba ka sorkar kam shah satia ba ngin ïakren ïa ka Reservation Policy na kata ka daw kam don jingmut ba ngin leit ktait ïa kajuh shikajuh.” u la ong.
“Kam don jingmut ban leit ïakren tang ha kaba ïadei bad ka Roster namar ka jingeh kaba mih hi ka dei beit tang bad ka Reservation Policy bad khlem da ktah ïa kane ka daw ka jingeh,” u la bynrap.
Haba kylli ïa ka daw ba ka VPP ka kyntait ïa ka jingkhot ïakren ka sorkar lyngba ka Dr Ampareen Lyngdoh, “ngi pdiang sngewbha lada ka sorkar ka khot ïakren ha kaba ïadei bad ka jingdawa ba ngi tyrwa ba kan ïakren halor ka jingdawa jong ngi hynrei palat ïa kata ngin ym pdiang da leilei ruh bad kum ka party katba ngim pat ioh da ka jingthoh ïa ka jingkhot ïakren ka sorkar,” u la jubab.
Haba kylli la u Bah Ardent un dang bteng ne em ban shah thngan u Dr ricky u la jubab, “U President un bteng ban shah thngan tad haduh ba urlong ka jingdawa, ngin ïakhun haban da jop ngin ym shukor ïa u paidbah uba la ai jingshaniah ïa ngi.”