New Delhi, Naitung 04: Ha ka rai kaba lah ban weng ruh ïa ka jingsheptieng ha kaba ïadei bad ka jingtuklar ka Supreme Court ïa ka jingpyntreikam ïa ka Reservation Policy, ka Supreme Court jong ka ri India mynta ka sngi, ka la kyntait ïa ka jingujor uwei u Nongsaid aiñ uba kyrteng u Sachin Gupta ba ka ïingbishar ba ha khlieh duh jong ka ri India kadei ban tuklar bad bthah ïa baroh ki jylla bad ki jylla rit ha ri India ba kin pynduh noh suki suki ïa ki Reservation Policy.
Haba shim bishar ïa kane ka jingujor mynta ka sngi, ka Division Bench kaba kynthup ïa u Chief Justice bad ïa u Justice Pamidighantam Sri Narasimha, ka la ong ba ka jingkyrpad une u nongsaid aiñ katkum ka Article 32 jong ka riti synshar ka ri India, kadei ka jingpyndonkam bakla ïa jingtreikam jong ka ïingbishar.
Da kaba kyntait bad pynkut ruh artad ïa kane ka jingujor jong une u nongsaid aiñ, ka ïingbishar ka la bthah ruh ïa u ba un siew ruh 25,000 tyngka sha ka Fund jong ka Seng ki Nongsaid aiñ ka Supreme Court bad ka la ai por ruh ïa u ba un pyndep ïa ka jingsiew hapoh artaïew bad un hap ba pyni ïa ka receipt ha u Registrar jong ka Supreme Court.
