Khliehriat, Jymmang, 09: Ka longkmie kaba la 30 snem ka rta na ka jylla Assam kaba shongwai ha Umstaiñ, East Jaiñtia Hills District ba la kynnoh ba ka la shah thang ha la ujong u kurim bad u khunrit ba dang ar snem ka rta ha ka 5 tarik mynta u bnai, ka la mih noh na Ganesh Das Maternal & Child Health Hospital, Shillong ha ka por 6.45 baje mynstep ha ka sngi kaba bud, kata ha ka 6 tarik mynta u bnai khlem da pynsngap wat ïa ki jingbthah jong ki bor pynïaid jong ka Hospital.
Ka thymmei khubor ba la ïohlum ka ïathuh ba ka longkmie lem bad u khunrit ki la leit phai sha jylla Assam bad kyntait ruh ban ïathuh ïa ka jaka sah kaba tikna jong ka bad ban ai u mobile number.
La ong ba kane ka longkmie ka la kam ruh ba la mynsaw na ka jingthang ïa u mombati wat hadien ba ki doktor ki la tohkit bniah ïa ka.
