Kyntait ka Ïingkashari ïa ka Chargesheet ba la aiti da u IPS ophisar halor ka jyrsieh thungkam

Shillong, Jylliew 29: Ka Ïingkashari u Special Judge, Assam ka la kyntait ban pdiang ïa ka chargesheet bynrap ba la aiti da u Ophisar IPS Prateek V Thube, kaba tohkit ïa ka jyrsieh thungkam da kaba siew pisa hapoh ka Assam Public Service Commission.
Ka Ïingkashari ka la bthah ïa ka Special Investigation Team (SIT) ba la khlieh da u Additional DGP (CID) Munna Prasad Gupta ba kan nang phah tohkit shuh shuh ïa kane ka kam da u Ophisar uba bat ïa ka kyrdan ym hapoh ka kyrdan DySP.
U Thube ula aiti ïa ka chargesheet bynrap pyrshah ïa saw ngut ki Ophisar ba kyrteng u Sukanya Das, Wahida Begum, A Nanda Bau Singh bad Rakesh Das myn ha ka 20 tarik Jylliew. Baroh kine ki Ophisar ki dei kiba la don ha ka jamin.
Ka SIT ka la pynlong ïa ka jingtohkit pyrshah ïa ki 39 ngut ki Ophisar kiba la shah jied ban long ki ACS bad APS bad kiwei ki Gazette Ophisar lyngba ka Combined Competitive Examination (CCE) ba la pynlong da ka APSC ha u snem 2013 bad 2014.
Napdeng kine ki 39 ngut ki Ophisar, 32 ngut ki dei jong ka batch 2013 bad 7 ngut ki dei jong ka batch 2014.
“Ka SIT ka la khot hajir ïa ki, tohkit ïa ki bad shim jingthoh ïa ki jingbatai jong ki. Kumta ka SIT ka dei ban lah shim rai halor ka jingtohkit ba la pynlong ïa ki. Ïa ka kyrteng jong ki dei ban pynpaw ha ka column 10 lane 11” ong u Special Judge ha ka hukum.
“Namar ka SIT ka khlem pynmih ïa ka kyrteng jong kine ki briew ha ka chargesheet, ka long kaba eh ïa ka Ïingkashari ban shim rai halor ka case pyrshah ïa ki. Ka paw ba ha ka por ba tohkit, ka SIT ka la tohkit ïa katto katne ki briew bad kurup ruh ïa katto katne ki kot ki sla. Ki jingleh jong u IO haduh mynta pyrshah ïa ki 39 ngut ki Ophisar ka long kaba sngewkhia bha bad kaba pynkyndit ruh ïa baroh,” ong ka Ïingkashari.