Kyntait ka Ïingdorbar ïa ka State Reservation Policy Bill ba la wanrah da u MLA ka VPP

Shillong, Nailar 27: Sa shisien pat ka Dorbar Synrai jong ka Ïingdorbar Thaw Aiñ ka Jylla ha ka sngi Ba-ar, ka la kyntait ban pdiang ïa ka The Meghalaya Reservation for Non-Creamy Layer of Scheduled Tribes (in State Reservation Policy) Bill, 2024 ba la wanrah da u MLA ka VPP na North Shillong Bah Adelbert Nongrum hapoh ka Ïingdorbar Thaw Aiñ.
Halor kane u Deputy Speaker u Timothy D Shira ula buh ïa ka Bill hapoh ka Ïing ban ïa vote bad kiba bun ki dkhot kiba kyntait da kaba ong “Em” kila bunpaid.
Haba wanrah ia kane ka Bill la iohi ba ym don uwei ruh u MLA jong ka Liang Pyrshah ki ban kyrshan ïa kane ka Bill.
Shuh shuh haba wanrah ïa ka statement of object and reason, jong ka Bill, u Bah Adelbert ula ong ba katkum ki jingkheiñ kiba don bad ka Sorkar Meghalaya, kila pyni shai ba ka ïoh ka kot jong kiba bun ki paid Scheduled Tribe ka Jylla ka dei kaba tlot bad kaba rit bad ka bym ïahab satia.
Shuh shuh na ka liang jong u u la ong ba ka Article 16(4) bad 15(5) jong ka Riti Synshar ka Ri ka shah ïa ka Jylla ban buh ïa ki kyndon khnang ban pynthikna ba ki jingmyntoi jong ka jingai bhah ka dei ban poi sha ki nongshong shnong kiba duna ka ïoh ka kot.
U Bah Adelbert ula ong ba naba ki 7 ngut ki Nongbishar ka Constitutional Bench ka Ïingkashari Supreme Court ha ka 6:1 majority, kila pynksan ïa ka jingtreikam ka sub-classification hapoh ka kyrdan Scheduled Caste bad Scheduled Tribe bad ai ka rai ba ki Jylla ki don ïa ka bor ban pynkha ïa kine ki jingbuh kyrdan.