Shillong, Iaiong 9 : Ka ïing Bishar High Court jongka jylla ha ka hukum ba pynmih ha ka 5 tarik Iaiong, kala kyntait ïa ka jingpan jamin jong u MLA barim ka Mawhati bad Chairman barim ka HNLC u bah Julius K Dorphang, uba la shah rai ban set phatok haduh 25 snem halor ka jingkynnoh leh beijot ïa ka Khynnah rit.
Une u MLA barim ka Mawhati ula shah pynngat ha ka kyndon aiñ POCSO bad shah pynshitom da kaba set phatok haduh 25 snem bad ka kuna ba T. 15 lak ha ka ïing Bishar Special Court jong ka Ri-Bhoi District namar u la shah kynnoh leh beijot ïa kawei ka khynnah ha u snem 2017 mynba u dang long MLA.
Haba kyntait ïa ka jingkyrpad, ka Principal Bench ba kynthup ïa u Chief Justice Sanjib Banerjee bad Justice W Diengdoh, ha ka hukum, ka la ong ba u Bah Julius ula don 52 snem ka rta bad “Da ka jingshah phatok haduh 25 snem, ka ïing Bishar ba bishar kala pynthikna ba shuwa ka por ba une u Nongpan jamin un lait na phatok, ka jingkwah brai ka met kan nym don shuh ha une u briew namar ka jingheh rta. Un nym lah shuh ban leh ïa ki kam awria”.
“Ka Jylla ruh kan hap shim jingkitkhlieh ban kitkhia ïa baroh ki jingsumar jong ka lanot ba lait im khlem ka jingsiew pisa khyndiat ruh, ka ban ïaryngkat bad ka kyrdan Grade-II officer ka Jylla ha kine ki 20 snem ban wan” ong ka ïing Bishar.
Ka ong ruh ba ka kuna, lada lah siew, bad ka song pisa ba la mang baroh kum ka bailutksan ka bym dei ban duna ïa ka T. 20 lak, dei ban ai da ka Jylla sha ka lanot da kaba kynshew ïa ka ha kata ka rukom tad haduh ba ka rta ba kala lah ban pynïaid kam. Ka Jylla kan hap ban siew ruh T. 5 lak sha ka lanot kum ka bailutksan nalor ka T. 15 lak ba ka ïoh na ka kuna.
Nalor kane, ka ïing Bishar kala bthah ruh lada don kano kano ka prokram ba kyrpang lane ka lad ïohkam kaba don lane ka kam kaba ka lanot ka lah ban trei lane lada don kano kano ka education prokram ïa ki Kynthei kaba lah ban pynrung ïa ka lanot, ka Jylla ka dei ban ai ïa baroh ki jingïarap ïa kane ka lanot khnang ba kan lah ban im ïa ka jingim kumba long lang kiwei kiwei.
