Shillong, Naitung, 30: Ki MDC jong ka Trinamool Congress ha ka sngi Palei ki la rah ar tylli ki Non-Official Motion ha ka dorbar jong ka Garo Hills Autonomous District Council (GHADC). Ka ‘Non-Official Motion’ banyngkong ka dei kaba la wanrah da u MDC jong ka Williamnagar u u Alphonsus R. Marak ban ailad na ka bynta ban ïathir ïatai ha kaba ïadei bad ka Separate Electoral Roll (kaba khang ïa ki bym dei ki Garo ban ïashim bynta ha ka elekshon ha GHADC) bad ka Non-Official Motion kaba ar ka dei kaba la wanrah da ka MDC na Dengnakpara ka Sadhiarani M. Sangma, bad u MDC na Kharkutta u Cherak Momin ban ailad na ka bynta ban ïathir ïatai halor ka jaka B-Mahal ha rilum Garo.
Ha ka jingïakren bad ki lad pathai khubor hadien ba la wai ka dorbar, kine ki MDC kiba la kyrshan ïa kane ki ar tylli ki mat ïatai ki la ïathuh ba ïa kine ki ar tylli ki mat ïatai la kyntait da u Chairman jong ka GHADC hadien ba la pynlong da ka jingïathep vote da ki MDC ka TMC ki la kyrshan ïa kane ka mat katba 14 ngut kiwei pat ki MDC ki la pyrshah. Ïa kine ki ar tylli ki mat ïatai la pynsangeh noh hadien ka jingïathep vote.
U MDC ka Kharkutta u Cherak Momin u la ong ba u pyrshang ban rah ïa ka mat kaba ïadei bad ka khyndew B-Mahal haoh ka dorbar jong ka GHADC hynrei ka Executve Committee ba la ïalam da ka NPP ka la pynslem na ka por sha ka por.
“Kim treh hi ruh ban sngap ïa ngi haba ngi la pan por ban ïakren halor ka ishu jong ka khyndew B-Mahal. Katkum ka jingsngewthuh jong ngi, ngi kwah ban shu leh sop sop khlem da ïasyllok lang bad ki kynhun bapher bapher jong ka GHADC, dei na kata ka daw ba kim ailad ïa ngi ban ïakren wat ha ka Dorbar,” u la ong.
U Alphonsush R Marak haba pynpaw ba kane ka mat ka long kaba kongsan ban ïakren hapoh ka dorbar, u la ong, “ngi la wanrah ïa kane ka mat ïatai namarba la dawa ym tang da ka Liang Pyrshah hynrei da ki paidbah kiba shong ha baroh ki kyndong kynshrot jong ka rilum Garo bad kumjuh ruh da ki kynhun bapher bapher. Ïa ka elekshon ba ladep, ki paidbah bad ki kynhun bapher bapher ki la pynlong da ka jingïaid paidbah ban pyrshah ïa ka jingïashim bynta jong ki briew ki bym dei ki Garo ha ka elekshon jong ka GHADC. Ngi la wanrah ïa kane ka mat ïatai na ka bynta ka jingmyntoi jong ki riewlum ka rilum Garo hynrei kito ki briew kiba don ha ka Treasury Branch jong ka GHADC (NPP) kim shym la pdiang ïa kane ka mat ïatai kaba ngi la wanrah.”
“Kane kam dei shuh ka sien ka banyngkong ba ma ngi, ki MDC ka Liang Pyrshah, kiba la wanrah ïa kane ka mat ïatai ha ka sien kaba lai. La lai sien kynthih, kim (EC) pdiang ïa kane ka mat ïatai ba ngi la wanrah, namarkata ngi la mih noh napoh ka dorbar,” u la ong.
“Ïa ka elekshon jong ka GHADC ym shym la pynlong da ka Chief Election Commission of India hynrei la shna la ki jong ki rul bad ki rukom pynïaid ïa ka elekshon da kaba pynshong nongrim katkum ka Khyrnit Bahynriew ka Riti Synshar jong ka ri India. La thoh shai ha ka sla kaba nyngkong jong ka Khyrnit Bahynriew ha ka para number 6 sub number 2 ba ka kynhun jong ki dkhot ba la shah jied jong ka Autonomous District Council kin shna ïa ki kyndon na ka bynta kito kiba lah bad ki bym lah ban ïashim bynta ha ka elekshon jong ka GHADC, ïa kaba ym shym la leh eiei haduh mynta. Ngi sngewsih ba ka Liang Synshar kam shym la shim ïa kano kano ka lad ban shna ïa kine ki kyndon,” la ong u Marak.
