Shillong, Lber 21: U MP ka Shillong Bah Ricky AJ Syngkon ha ka sngi Palei, ula kyntu ïa u Myntri ka Ministry of Road Transport and Highways Nitin Gadkari ban tuklar lem halor ka jingdonkam ban don ka Independent Quality Audit (IQA) ïa ka jingshna ïa ka surok National Highway -6.
Ha ka shithi kaba la ai ha u Gadkari, u Bah Syngkon ula ong, “Nga kyntu ïa ka ophis ka jong phi ban tuklar mardor bad ban shim ïa ki sienjam kiba pyrkhing ban pynbeit ïa ki jingdkoh halor ka jingpyntrei ia kane ka surok. Ka long kaba donkam ban don ïa ka Independent Quality Audit ïa ka surok bah NH-6 ban khmih ba dei ban don ïa ka jingkitkhlieh ha ka rukom treikam kaba paka bad ban pyrkhing ïa ka rukom shna katkum ka kyndon kaba dei ban leh, ban pynthikna ba kan ym don ka jingdkoh ha ki por ban wan.”
U la kynnoh, ba ka la don ka jingïapeiñ bad ka jingshna bha ïa ka surok National Highway-6, ka lynti ïaid kaba kongsan kaba pynïasoh ïa ka Meghalaya bad kiwei pat ki jylla, kaba plie lad ïa ka kam khaïi pateng bad ïa ka kam jngohkai ha ka thaiñ baroh kawei.
“Watla kane ka projek ka long kaba kongsan bha, hynrei ka rukom shna ïa ka surok ka long ka bym lah ban pdiang, namar ka kam ka la suki bad khamtam kaba sngewkhia bha, ka dei ka rukom trei kaba torti ïa ka kam. Da kaba shimkhia ïa kiba bun ki jingujor kiba la ïoh pdiang ha kaba ïadei bad ka jingbym trei bha ïa ka kam, nga la aiti ha uwei u briew ban leit jurip bad ban pynshisha bad ban khmih ïa ka jinglong jingman ïa ka rukom trei ïa ka kam,” la ong u MP bad ka bynrap, “Ka jingjurip ryngkat bad ka jingring video ïa ka surokbah ha ka shnong Kuliang ka la pyni shai kdar ba ïa ka rong la lah ban khlong da ka kti, kaba pyni shai kdar ïa ka jingbym don ïa ka jingkitkhlieh bad ka jingtrei torti ïa ka kam kontrak bad ka pynpaw ruh ïa ka jingpyndonkam da ki mar kiba tad dor da u kontraktor. Kum katei ka rukom treikam ka ktah jur ïa ka jingneh slem bad jingskhem jong ka surok, khamtam ha ka thaiñ kaba don ïa ki jaka kiba long riat bad kaba shah ktah na ka jinglong jong ka suiñbneng bad kiwei ki jingeh.”
U la ong, “Katei ka surokbah kaba dei kaba kongsan bha kadei ban don ïa ka jinglong jingman kaba bha tam bad kaba don ïa ka jingshngaiñ, lada ka pulom, kumta kan sted bha ban jot ne sniew noh bad kan pynkiew ïa ka jinglut ha ka bai maramot bad kan buh ha ka jingma ban mih ki jingjia aksiden bad ki jingmynsaw.”
