Shillong, Lber 17: U MDC ka BJP na Tura u Bernard N Marak ha ka sngi U Blei u la ong ba ha Garo Hills, na ka liang ka Centre Scheme Monitoring Committee (CSMC) ka la leh ïa kiba bun ki kam kaba kynthup ïa ki kyrteng jong kito kiba ïoh myntoi kiba la shah iehnoh da ki Gram Sevak ha ki Block.
“Ki nongshong shnong ki la pynpaw ba da ki hajar ngut ki longïing ki la shah ieh napoh ka thup kyrteng ba la ai sha ki Block da ki Secretary ki VEC (Gram Panchayat). Ban peit ban pynïaid kam bad ban ïarap, la thaw ïa ka CSMC ha ki VEC level kaba la pynkupbor ïa ki nongshong shnong ban peit ïa ki jingtreikam jong ki skhim ka sorkar pdeng khnang ba ki longïng kin ym shah ieh bad ba ki longïng kiba la shah ban beiñ kin ïoh ïa kitei ki skhim,” ong u Marak ha ka kyrwoh khubor.
U la ong ba ka kynhun jong ka Monitoring Committee ka la pynpaw ba bun na ki longïng longsem ki la shah ieh ha ki gram sevak bad ha ki block ha ki por ba la leit bad da kiba bun ki snem hynrei mynta ki la shah kynthup bad ki la long ki nongïashim bynta kiba shit rhem ha ki committee jong ki shnong.
Kitei ki longïng ki la shah ieh noh ban ïoh ki skhim kum ka PMAY (BPL houses), NREGA (Job cards), RATION CARD, IHHL (Latrines), Pension bad kiwei namar ym don uwei ruh uba shim khia ban ïarap ïa ki ha madan. Ha ka jaka ban lum ïa ki ïa ki jingtip kiba bniah na kitei ki longïng, ki Gram Sevak kiba la don ki jingduna ki nongtrei ha kiba bun ki C and RD block, ki la kyntu ïa ki VEC secretary ban shim ïa ki kyrteng jong ki longïng longsem na ka bynta jong ki hynrei kiba bun ki shnong ki Secretary ki VEC ki pulom ban kynthup ïa ki longïng kiba dei hok ban ïoh ki lad jingmyntoi ban shah kynthup lang hapoh ka thup, u la bynrap.
Na ka liang u Marak u la ong ba ki la don ki por jong ki jingtreikam, ki kyrteng jong ki longïng kiba dei hok ki la jah napoh ka thup ki nongïoh jingmyntoi naba ki la don katto katne ki nongtrei ki seng saiñ pyrthei kiba la don hapoh ka thup ha kaba kane ka la ïalam sha ka jingshah iehnoh ki longïng kiba dei hok ban ïoh ïa ki skhim hapoh ki kyrdan jong ka Gram Panchayat.
“Ha kiba bun ki jingjia, ka kynhun jong ngi ki la leit ban pynshisha ïa ka thup kiba ïoh myntoi kaba ngi la ïoh napoh ka Centre kaba la paw ba ki longïng ba duk kiba la don hapoh ka thup ki khlem ïoh ïa ki skhim wat hapdeng ba ki kyrteng jong ki ki don hapoh ka thup jong ka sorkar pdeng,” u la ong da kaba bynrap, “Ki la don ruh ki jingjia ha kaba kijuh ki longïng ki ïoh bunsien ki jingmyntoi tang namarba ki ïoh ka jingkyrshan na ki katto katne ki nongïalam saiñ pyrthei.”
Shuh shuh u Marak u la ong ba lyngba ki RTI la pynpaw ba ki la don bun ki jingbakla ha kaba pyntreikam ïa ki skhim ka sorkar pdeng. Bun ki tnat sorkar kim pynpaw ïa ka kyrteng ki sub-contractor bad ki jingtip ba bniah jong ka JJM, PMGSY, NREGA, ki supplier bad kiwei namar kine ki contractor ki dei jong ki katto katne ki seng saiñ pyrthei. Ka BJP kan sa pynpaw ïa baroh hadien ba la ïoh shibun ki jingtip lyngba ka CSMC.
