Shillong, Rymphang, 04: U MDC ka Tura u Bernard N. Marak u la kynnoh ba ki nongsam Gas lyngba ka Pradhan Mantri Ujjwala Yojana (PMUY) ki dawa pisa na ki nongthang Gas baduk ha ki katto katne ki bynta ka rilum Garo.
Ha u kyrwoh ba la phah ha ka sngi u Blei, u MDC ka Tura u la ong, “ka pisa ba la dawa na ki nongthang Gas ka long T.1,000 haduh T. 1,500 ha ki katto katne tylli ki shnong. Hynnin ka sngi la don ba pyntip ïa nga lyngba ka telephone na ka shnong Rewak, South Garo Hills ha kaba uwei u briew u la shah dawa ban siew ïa ka pisa T. 1,500 shi iing ban ïohei ïa u tyndong Gas. Ki don ruh ki jingujor na kiwei kiwei ki bynta jong ka rilum Garo bad nga kyrpad ïa ki nongsam ha ki District ba kim dei ban dawa pisa na ki nongïoh jingmyntoi. Nga kyrpad ruh ba dei ban leh da kaba tyngeh ïa kito kiba donkti ha kane ka kam be-aiñ.
“Ka PMUY ka dei ka scheme na ka bynta ki kynthei kiba im hapoh u laiñ ka jingduk. Lyngba kane ka skhim la ai Gas ei sha ki kynthei. Ki nongthang Gas kim donkam ban siew ïa ka pisa ban ïoh ïa u tyndong lyer shet ne ban siew ram ban pyndap ha ka sien banyngkong eh ha ka hynriew siew na ka bynta u tyndong uba 14.2 kilo. Ïa ka EMI dei ban siew tang haduh ka sien pyndap kaba hynñiew. Kum kine ki skhim la shu rong ei da ki katto katne ki riewshimkabu kiba pynbudnam sniew ïa ka jinglehbha u Myntri Rangbahduh ka ri u Narendra Modi,” ong u Marak.
