Nongstoiñ, Naiwieng, 8: Ki paid nongshong shnong jong ka shnong Umrïang Mawïamsyiem bad ka Mawblang Mawïamsyiem, ki la shah pynduh noh ïa ka hok ban thep vote ha ka jylla Meghalaya naduh u snem 2007 bad haduh mynta ym pat lah ban tip na kaei ka daw.
Ïa kane la pynpaw da u bah Jinarson Marak Headman ka shnong Umriangkona ba ju thoh ruh Amrengkona Raidmynsaw Rambrai Syiemship katkum ka Epic bad u bah Histing Sangma u ba dei u second President ka shnong Mawblang Mawïamsyiem, ha ka jingïakren bad u nongthoh khubor.
La ong ba kitei ki ar tylli ki shnong ki hap hapoh u pud u sam jong ka West Khasi Hills District, kaba dang dei ruh hapoh ka jingsynshar jong u syiem Phlowel Syiem, Syiem ka Hima Nongmynsaw Syiemship. Katei ka thaiñ ka don ha ki khappud hapdeng ka jylla Meghalaya bad Assam bad ka dei ruh ka shnong kaba dang don ha ka jingshongsuk shong shngaiñ haduh kine ki sngi khlem ka jingïakajia khappud.
Kitei ki nongsynshar shnong ki la ong shuh shuh ba na ka liang jong ki kum ki nongsynshar jong katei ka thaiñ, ki da angnud bad thrang dik dik ban pynhap ïa ka shnong jong ki ha ka jylla Meghalaya lada ki ar tylli ki sorkar jylla ki don ka jingïapynbeit pud.
Kitei ki ar tylli ki shnong ki don kumba 150 tam ei ei ki tnum ïing bad kumba 1000 ngut ei ei ki paid nongshong shnong haba kheiñ kyllum lang ha ka jingbun paid. Kitei ki nongsynshar shnong ki la pyni ïa la ki epic barim ka pyni shai ba ki dei ki nong Meghalaya bad ki la kynnoh ruh ba u MLA, ha ki snem 2007 u ba na katei ka Rambrai Jyrngam konstitwensi u la pynduh jubor ïa ki epic jong ngi
Haba ïadei bad ka jingeh jong kitei ki shnong, na ka liang jong ka kong Aicifull K.Musulman ka longkmie kaba thmu ban ïakhun ïa ka election ha u snem 2023 na ka seng TMC, ka la kular ban ïarap ïa kitei ki shnong ban pynïoh biang ïa ka hok ban thep vote biang ha jylla Meghalaya.
