Nongstoiñ, Naitung 2: Ki katto katne ngut ki supplier kiba la thep kyrteng na ka bynta ka kam supply jong ka scheme PMMSY kaba dei jong ka tnad Fisheries, ki la pynpaw ïa ka jingbym sngew hun halor ka rukom plie ïa ki quotation ba ki la dep thep na ka bynta katei ka scheme, namar ka jingpynkheiñ hi jong katei ka tnad ïa ki kyndon bad ka por ba la buh.
Na ka liang kitei ki Supplier kiba la leit ban ïakynduh ïa ka Director jong katei ka tnad hapoh Shillong, ki la ïathuh ba ha ka jingshisha ka jingplie ïa ki quotation ka dei ha ka 28 tarik u bnai Jylliew 2023. Hynrei na ka liang jong ka office Fisheries ka ong ba kim pat lah ban plue ïa ki quotation ha kato ka sngi namar ba ym pat poi lut ki quotation na kiwei ki District.
Kaei kaba ngi sngew lyngngoh ka long ba haba la buh last date ban thep ïa ki quotation ha ka 26 tarik bad ban plie ha ka 28 tarik, kumno ki dang shah ban thep ne ban dang pdiang ïa ki quotation kiba poi hadien ka sngi kaba la buhï. Buh jingkylli kitei ki Supplier.
Shuh shuh ki la pynpaw ruh ba katei ka tnad ka la pynjlan noh ïa ka jingplie ïa ki quotation sha ka 30 Tarik mynta u bnai, hynrei kaba lyngngoh ka long ba ynda ngi la wan hangne ha office ban tip mano ki supplier kiba ïoh ban supply ïa kano ka tiar khnang ba ngi ruh ngin suk mynsiem lada ngi ïoh ne ngim ïoh ruh, Phewse ynda ngi poi hangne ki shu ong beit ba kin sa pyntip ïa ngi hadien mano ba ïoh ne bym ïoh.
Kitei ki Supplier ki la pynpaw ïa ka jingbym sngewhun ïa ka rukom leh jong katei ka tnad bad ki la suba jur ruh ba ka lah ban don kaei re kaei sha lyndet kaba lam sha ka jingleh shilliang ha kaba kim kwah ban pynpaw wat tang ïa ki dor ba la thep quotation da ki supplier ha ka sngi ba plie ïa ki.
Ngi lah ban ong ba lada ki kwah ban leh tuh na office bad ki kwah ban thep da u supplier u ba ma ki, ki donkti lang, ki lah ban leh da kaba suk ïa kata, namar kin shu peit thuh beit mano ba thep rit duh ïa ka dor bad hangta kin sa pynrit shuh shuh sa maki bad wat Lada ki pynrit tang shiphew naïa ruh kamut ki la ïoh noh tang kine lane u supplier uba don jingïadei bad ki.
Kumta, ngi pynpaw ka jingsngew khia halor kane ka jingleh jong ka office ba kim long transparent ne long shai ha ka rukom plie ïa ki quotation bad kane ka pynlong ïangi ba ngin tharai sniew ïa kane ka rukom treikam jong ki.
Ki la pynpaw ruh ha ka jingshisha ha kiwei kiwei ki department, haba ki ong ban plie tender ne plie ïa ki quotation ki pynbna beit ïa ki dor bad uno u supplier uba thep rit duh ïa ka dor ruh ki pyntip mar mar ha kato hi ka sngi hakhmat jong ki supplier ne representative jong ki supplier, hynrei ha kane ka office Fisheries patde ka long khongpong bad kane ka jingleh jong ki imat ka don shisha kaei re kaei sha lyndet.
