Jowai, Jylliew 15: Ka War Jaiñtia Students’ Union (WJSU) hapoh ka jingïalam jong u Sports and Youth Secretary samla Deilang Syad ha ka jinghiar jurip ïa ka rukom shna ïa ka madan ïalehkai Synthetic Football Turf jong ka Amlarem Sub-Division Sports Association (ASSA) kaba dang ïaid shakhmat mynta ha Lad Japlem, Amlarem, West Jaiñtia Hills ka la kam ba ka la lap shibun ki jingbym biang ha rukom pyntrei ïa kane ka projek khamtam ha kaba ïadei bad ka jingpynlut pynsep ïa ka pisa.
Ha u kyrwoh ba la phah da u Publicity Secretary u samla Gabriel Shylla, ka Union ka la kam ba ka katkum ka jingïoh jingkheiñ ha kaba ïadei bad ka jingshna ïa ki jaka pyntuid um kiba don sawdong jong ka madan ka long T.34,21,000 hynrei ka rukom shna bad ki tiar ba la pyndonkam kam ïahap satia lada kheiñ bha ïa ka rukom shna kaba long tang kumba 25% na ka jingpynlut.
Halor kane ka seng ka la kyntu ïa ka tnad Directorate of Sports and Youth Affair ka Sorkar Jylla ban phah jurip hi dalade ïa ka rukom shna madan bad ban bthah ba dei ban pyntrei katkum ki kyndon jong ka FIFA ne ka FIFA pro Quality Criteria.
Ha kaba ïadei bad ka rukom pynshna ïa ki jingker nar kiba don sawdong ka madan ha ka jinglut kaba kot T.57,65,000 ka seng ka la ong ba ïa kane ruh kam lah ban pdiang namarba ka rukom shna kam long kaba biang.
Ka Sports and Youth Sub Committee jong ka WJSU kan sa ai da ka jingthoh sha ki bor ba dei peit ban dawa ba dei ban shna da kawei pat ka jingker kaba biang kumba long lem ha kiwei ki Stadium.
Ha kaba ïadei bad ka rukom shna pynbha ïa ki jaka peitkai Gallery “Repair And Renovation Works (L/S) kaba la mang pisa T. 52,35,000 ka Union ka la kynnoh ba kane ruh kam long kaba biang ha ka rukom pynwandur ïa ka jaka ban pynsuk ïa ki paidbah ban shong ha ki Gallery.
Ka seng ha ka jingwad bniah shuh shuh ïa ka dor ban siang ïa u phlang plastic (Artificial Turf) ha kane ka madan ka la kam la lap ba u shongdor T.4,82,92,000 hynrei katkum ka jingkheiñ ba la mynjur da ka FIFA kynthup ka jingshna ïa ki nala um ka shongdor ym palat ïa ka T. 1,85,00,000.
Halor kine ki jinglap, ka Union ka la pyntip ba kan sa ujor noh sha ka Directorate of Sports and Youth Affairs ka Jylla bad ban pan jingtip kaba bniah da ka RTI ha ka sien kaba ar na u Chief Engineer ka State Sports Council, Meghalaya, Shillong.
Ka seng ka la kren shai ba lada kim ïoh ïa ki jingpynshai kiba bniah kan sa ujor sha u Controller and Auditorial General (CAG), sha u Lokayukta ne wat shaduh ka ïingbishar High Court.
“Na ka bynta ka jingmyntoi jong ki khun samla ka thaiñ War Jaiñtia, ka seng kan ïeng skhem ha ka nongrim ‘ba ka jingshna pynbna ïa ka madan ïalehkai ka dei ban long beit kaba ïa ryngkat kyrdan bad kiwei ki madan hapoh ka ri” la ong u kyrwoh.
