Shillong, Ïaïong 17: Ki nongïakam jong ka KSU West Jaiñtia Hills District, ku la kynnoh ba ka sorkar ka la khang ïa ki Pulit ka Meghalaya ban leit ne ban tur sha ki jaka jong ka Assam ha Block I wat haba don kino ki jingeh ba ki paidbah ki ïakynduh ha kine ki jaka ba don ka jingïakajia.
U General Secretary jong ka Seng haba ïakren bad ki nongthoh khubor hadien ka jingleit hiart sha Moojem, ka Shnong kaba la shah thombor ha ki Karbi na Moothade ha kine ki sngi baladep, u la ong ba katba ki nongïalam jong ka Seng bad ki Pulit ki dang hiar sha Moojem, hynrei ynda poi ha Mookailum, ki Pulit kim shym la treh shuh ban leit sha Moojem, da kaba ai daw ba kim lah ban leit sha katei ka jaka kaba ka Meghalaya ka ong ba ka hap ha Assam namar ba kim shym la ïoh bor ban leit sha katei ka jaka kaba hap hapoh u pud u sam ka Assam.
Na ka liang jong ka Seng ka pynrem jur ïa kane ka jingleh ka sorkar Meghalaya kaba u ong ka buh jingeh ïa ki paid Khasi Pnar kiba shong ha ki shnong Khasi ba hap ha ka Elaka Labang Nongphyllut Block I, haba ki shah thombor kumne ha kiwei pat ki jaidbynriew. U la kyntu ïa ka sorkar Meghalaya ba kadei ban aibor ïa ki Pulit Meghalaya ba kin leit sha ki shnong jong ki Khasi Pnar ha Block I, namar ba ki Pulit Assam ruh haba jia ki jingjia kiba kum kine ki rung beit sha ki Shnong Khasi kiba hap ha Meghalaya. “Ka sorkar Meghalaya kam dei ban leh kumne, hynrei kadei ban aibor ïa ki Pulit ka jylla ba kin rung sha ki shnong Khasi wat lada ka Assam ka kam ba kadei ka jaka jong ka”, u la ong.
Ha kane ka jingleit sha Moojem, ka la don ka jingïakren pynbeit hapdeng ki nongialam ka KSU, ki nongïalam jong ki Karbi na Moothade ryngkat ka jingïadon lang ki Pulit Assam. Na ka liang ki nongïalam ka KSU ki la ban ba die ban ïapeit ïa ki kot ki sla kiba don ban tip hangno kane ka shnong ka hap bad ym dei ban shu ïakren khlem kot khlem sla ne khlem jingshisha.
La ïathuh ba ki Karbi na Moothade ha kine ki sngi baladep, ki la hiar sha Moojem ka shnong Khasi bad ki la pynjot bad pynjulor ïa ki jingthung jingtep jong ki trai shnong ka Moojem bad ïaleh ruh ban knieh jubor ïa ki jaka ki puta jong ki Khasi Pnar ha katei ka shnong.
