Kynnoh ka HITO ba trei torti u Contractor ïa ka surok by-pass Shangpung Sutnga-Pasyih Garampani

Jowai, Jylliew, 25: Ka Hynñiewtrep Integrated Territorial Organisation (HITO) Shangpung Unit ha ka sngi Palei ka la hair ban jurip ïa ka jingshna ïa u Surok By-pass uba la tip kum u Shangpung Sutnga Road to Pasyih Garampani Road ha ka jingjngai kaba 1.2 KM ha ka jinglut kaba 10,70,72,000 ryngkat bad ka jingkieng kaba 40 metre ei ei, hadein bala ïoh ïa ka jingujor na ki paidbah ka thaiñ kiba la ïohi ïa ka jingtrei torti ïa u ne u surok.
Ha kane ka jingjurip ka seng ka la lap ba ki kynroh bah jong ka jingkieng ka la sdang ban orpait naduh trai haduh khlieh bad kaba buh jingma ïa ki nongleit nongwan kiba pyndonkam ïa une u surok bad la lap ruh ha ki bynta ba khyndait bala dep ban siang rong la ïohi ba ka jingstang bad ka jing torti haduh katta katta.
Na ka liang ka seng ka la ong ba kane ka jingtrei torti jong ki Contractor kadei ka jingbym shim khia bad ka jingbym don ka jingkit khlieh na ka office jong ka u Executive Engineer PWD Shangpung Division, namar katkum ki kyndon ka tnad ba dei peit ka la dei ban don ka jingjurip na ka office man ka por naduh ka inspection report, monitoring report bad progress report khnang ba ki Contractor kin nym nud ban trei katba mon hynrei hangne la ïohi ba ym don mano mano ba wan khmih bniah ïa ka jingtrei dei na katta ka daw ba ki contractor ki trei torti.
Shuh shuh na ka liang u President ka HITO Shangpung Unit u Samla Haimonmi Suchiang ula ong ka seng ka la leit ban ujor daka ejahar pyrshah ïa ka office u Executive Engineer PWD Shangpung Division mynta ka sngi ha Raliang Police Station hynrei na ki daw ba ym don ki officer incharge jong katei ka Police Station la sangeh noh shwa ban buh ïa katei ka Ejahar.
Ka seng haba ïakren bad ki Constable kiba don ha Raliang Police Station la bthah ïa ki da i incharge ban leit buh noh daka jingujor sha ka bor bahalor jong katei ka tnad ba pyntrei ïa u tei u surok bad na ka liang ka seng ka la ong ‘ngi la shait mad ïa kum kine ki jingujor kim poi sha ei sha ei ki shu kut tang hapoh ka file ki Engineer dei halor kane ka nongrim ngi sa wan ban buh daka ejahar syndon’, la pynkut u kyrwoh na ka seng.