Kynnoh ka HANM bym biang ka rukom pynïaid ïa ka Subroto Cup
![](https://mawphor.com/wp-content/uploads/2023/07/hanm-Copy.jpg)
Nongstoiñ, Naitung 2: Ka seng HANM ka la kynnoh ba ka don ka jingbym biang jong ka rukom pynïaid ïa ka Subroto Mukherjee Cup football tournament 2023 naduh ba sdang, kumta ki nongïalam kim sngewhun satia.
U bah Willstone Sohshang president ka seng haba ïakren bad ki nongthoh khubor ha ka sngi saitjaiñ ba la dep, u la ong ba ka jingpynlong ïa ka District level Subroto cup ha West Khasi Hills kam biang satia naduh ka por ba ki sdang ban jied ïa ki khynnah skul kiba dei ban ïashimbynta ha katei ka lynpung ïalehkai.
U la ong ruh ba bun ki kmie ki kpa jong ki khynnah ki la ujor sha ka seng ba ka por ba pynlong ïa katei ka lympung ïalehkai ka dei ha ka por ba ka Exam ka la jan sdang bad ka ktah haduh katta katta ïa ka por khreh kot jong ki khynnah.
Nalor kata u la ong ruh ba ha ka por ba ka jingïalehkai ka sdang, ka la dei ruh ka aïom slap bad namar ka jingktieh palat ka madan, ka la pynlong ïa ki khynnah ba kin ym lah ban pyndonkam hok ïa ka sap ïalehkai ba ki don.
Ha kine ki sngi ba u slap um sangeh satia bad bun ki khynnah kiba ïalehkai ki kem shitom bad bun ki kmie ki kpa jong ki khynnah, ki la ong ba kim treh shuh ban phah ïa ki khun ba kin leit ban ïashim bynta ha katei ka lympung ïalehkai wat haba ki la shah jied ruh.
Utei u nongïalam ka seng u la ong ruh ba ka jingaipor khyndiat palat ha ka por ba ki leh ïa ka screening committee ruh kam ïahap satia, namar ka lyngkot palat bad shuwa ban jied ïa ki khynnah ka dei ban long la kumno kumno lai haduh saw sngi khnang ban ïoh ïa ki khynnah kiba biang.
U la ai jingmut ruh ba na ka bynta ka screening committee ka dei ban jied da ka independent body, namar ba ka don ka jingujor ba ka don ka jingshah kynnoh ba ki syrnod jong ki, kim dei kiba shisha bad ha kaba ïadei bad kane utei u nongïalam ka seng u la ong ba lada lap ba ki don kiba kum kita kin sngewbha ban phah pynbiang da ki syrnod kiba shisha.
Ha kajuh ka por u la ong ba ki khynnah kiba dei na ki skul kiba jngai kiba wan ban ïashim bynta ha katei ka lynpung ki shem jingeh bha, namar ba ym don wat tang ka jaka sah ruh bad haba ki wan ban ïalehkai ki hap ban shu wan rwing da ki kali ha ka jinglut kaba bun, katba ka por ïalehkai pat ka long man la ka sngi. Kumta ki shem jingeh haduh katta katta ym tang ïa ki khynnah hynrei wat ïa ki kmie ki kpa kiba hap ban sei ïa ka pisa na ka bynta jong ki.
U la ong ruh ba ki don ki skul ba ki khynnah kiba ïashimbynta kim dap khatwei ngut bad haba ki ïalehkai bad ki kynhun kiba biang player ki shah thep da ki phew kol, kumta ka long ka jingjah burom kaba khraw ym tang ïa ka kynhun hynrei wat ïa ka skul baroh kawei.