Kynnoh ba ïatreilang ki Assam Pulit bad ki lehnoh Karbi ban thombor ïa ki Pnar ha Block-I

Jowai, Nailur 12: Katkum ka tyllong khubor ba tikna ba la ïoh lum na ka thaiñ Khanduli, Lapangap,Mukroh, Saba bad Khatkasla la kynnoh ba katba nangmih ki sngi da ka jingïatreilang ki Assam Pulit (Assam Police) bad ki lehnoh Karbi ka la pynshongsyier ïa ka leit ka wan jong ki paid-Khasi-Pnar hapoh ka thaiñ Block-I.
Shuh shuh la ong ba ki Karbi- kiba shong basah hapoh u pud u sam jong ka Pangam-Raliang,Elaka Raliang, kum ka Umkhrmi, Mothade bad Tibin, kiba shu wan shong shnong hapoh kane ka Elaka Raliang, kiba shong basah ha Wanpung (Ummaleng) Tahpat bad Lakaroi, Elaka u Doloi Shiliang Myntang bad ki Karbi kiba shong basah ha Myn-I, Umpawiang, Umphoh bad Langkarja Elaka Nongjngi kiba baroh shi katta ki im hapoh ka Jowai Sub-Division bad kiba ïa im ïasahlang bad ki Pnar ki kwah ban don hapoh u pud u sam jong ka Jaiñtia Hills Meghalaya.
Hynrei pat kim nud ang eiei namar kine ki lehnoh Karbi kiba wan na shabar jong ka Block-I ha ka jingsynran jong ki Pulit Assam ki maham ïa ki Karbi kiba shong basah hapoh u pud u sam jong kine ki Elaka ki khanglad ïa kane ka jingkwah jong ki Karbi ban ïa im ïasah lang bad ki Pnar ka Rilum Jaiñtia.
Nangta ki tyllong khubor ba thikna la ong ba ki shnong Karbi kiba kine ki lehnoh Karbi ki shong ki sah, ki la kylla kitram naba kine ki lehnoh Karbi-ki bam ki dih bad lum pisa na ki nongshong shnong Karbi. Shuh shuh la ong ba kine ki lehnoh Karbi mynta ki la pyrshang bad dawa pisa jubor na ki Khasi- ki Pnar kiba shong basah hapoh ka Elaka Labang-Nongphyllut bad Pangam Raliang.
Lada kine ki lehnoh Karbi kin dang ïaibteng ban sah ha ki shnong Karbi, ki Karbi kin sa kylla ki Nongkitram bad haba kim lah shuh ban shah ïa kane ka jingkitram jong ki kan sa mih hi ka jingïakynat hapdeng para maki ban shuh shuh ki tyllong khubor kiba thikna.