Kynmaw tympang u Ma R. Prowel Marweiñ ïa jingïaid lynti 3 sngi na Mawlangwir sha Mawkapiah

Nongstoiñ, Naitung 29: Ka jingroi jong ki shnong ki thaw ha ki bynta ba shaphang shatei jong ka West Khasi hills khamtam eh ha ki bynta kiba ha syndah bad ka jylla Assam ka dei da ka jingleit buhai shnong jong ki briew kiba dei na ka hima Maharam kum na Mawkyrwat, Mawlangwir, Mamerang, Rangthong, Phodjaud, Mawranglang, Wahsiej, Sohkhyllam, Marshilong, Mawthawpdah, Nongsynrieh, Mawten, Nonglang (South West Khasi hills) Mawrap bad kiwei kiwei.
Katkum ka jingïathuh jong ki riew tymmen la ong ba ha shuwa jong u snem 1950 ki bynta ba shaphang shatei jong ka West Khasi hills kata naduh ki bynta ba shaphang sepngi kiba hap ka hima Nongstoiñ, ka hima Nonglang, hima Riangsih hima Jyrngam hima Raidmynsaw hima Rambrai bad Myrïaw ki dei ki jaka kiba dap da ki khlaw kiba rben bad kiba shong ha kitei ki jaka ki dei tang ki dkhar Nepali kiba shong khuti muid bad khuti masi.
Ha ka jinglum jingtip bniah jong u nongthohkhubor jong u Mawphor ïa ka jinglong jingman jong katei ka thaiñ ha ki por mynshuwa la ïoh ban ïakren bniah bad u Ma R. Prowel Marweiñ 78 snem ka karta uba dei na ka shnong Mawlangwir hima Maharam uba la kynmaw naduh ka por ba ki mih na Mawlangwir ban leit buhai shnong ha Mawkapiah West Khasi hills uba la shong la sah mynta ha Mawïonglumsyntiew (Nongstoiñ). Haba ïakren halor katei ka phang u Ma Prowel u la ong ba haduh kine ki sngi u dang kynmaw tympang ïa ka jingïaid lynti na Mawlangwir haduh Mawkpiah kaba la shim por haduh lai sngi kynthih.
U la ong ruh ba ki la mih na ka shnong Mawlangwir ha u snem 1964 ryngkat bad ki masi, ki blang, ki da kit ruh ïa ki tum ki tam kum ki khiew ki pliang, ki nep kup tiah, bad kiwei kiwei. Ha katei ka jingïaid lynti ïa ki masi khun bad ki blang kiba dang rit haba kim lah shuh ban ïaid ki rah bad kynthup ha shadem katba ha ka met pat ki kit ïa ki tum ki tam. U la ong ruh ba ha ka sni ba nyngkong ki la hap ban sah miet ha shiteng lynti ka kawei ka jaka kaba ki khot mynta ka Langpyrdaw.
U Ma Prowel u la ong ruh ba ha ka por mynmiet ki la sliew da ka ding kaba klang bha bad ïa thiah sawdong ka jaka sliew ding ynda ki la ïoh thiah bha kumno re kumno u la kum ksaid ïa ka nep kup thiah ha ka ding bad ka la kem ding hynrei don bok ba u kpa uba thiah ha syndah u la lap ïohsngew bad la pynlip noh ïa ka ding.
Ha ka sngi ba ar ki la khie dang step bad ïaid biang lyngba ka shong Marskuiñ bad kam sha shiliang ka wah Kynshi ter ter bad bud ïa ka pyntha Umyiap bad ki la poi haduh u lum Mawrok bad ki la sah miet biang hangta bad ha ka sngi kaba lai ki la mih na Mawrok bad ki la poi ha Mawkapiah ha ka por noh phai sngi. U la ong ruh ba ha Mawkapiah ki la don lypa saw tylli ki longïng kiba la leit buhai shnong kham mynshuwa bad ynda la poi sa ma ki ka la kham sngewshngaiñ bha.
U la ong ruh ba ha katei ka por namar ba ki khlaw ki btap ki dang rben haduh katta katta ki mrad ki mreng kum ki khla, ki sier, ki hati, ki dngiem, ki sniang khlaw, ki skei bad ki laiphew jait mrad ki don lut. U la ong ruh ba ha ka por mynmiet ki la ju wan beit beit sha sem masi bad sem sniang ban rong ïa ki sha khlaw bad bam doh. Nalor kata haba rep kba ha pynthor ynda u kba u la sdang sei man la ka sngi naduh dang step bym pat mih ka sngi uwei u briew na kawei ka longïng u dei ban leit sha pynthor ban ap namar ka jingbun palat jong ki kynja sim, ki bad ki phreit kiba bam ïa ki symboh kba namar lada ym leit ban ap haduh ban da dei ka aïom ot yn ym don kba shuh.
Ha kajuh ka por u la ong ba namar ba ki shnong kum ka shnong Nonglang, Umwahlang, Kyrdum ki jngai bad ki nongshong shnong ruh ki dang duna ha ka shnong Mawkapiah ki ïalong paralok bha tang bad ki Nepali kiba shong khuti muid bad masi ha Kyndongei bad Nongstong. U Ma Prowel u la ong ruh ba ynda u la sdang samla malu mala u la leit skul ha ka M.E.skul kaba don ha Nonglang bad na Mawkapiah ha Nonglang u ju leit rwing da ka kjat bad ka shim por kumba shikynta shiteng bad hadien katto katne por u la kyrpad ïa u kpa ba un pynthied noh da u kulai bad u la pyndonkam ban shong haba u leit skul.
U Ma Prowel u la bynrap ruh ba baroh ki jait Marweiñ kiba shong ha ka shnong Mawkapiah bad Nonglang ki dei kiba mih na Mawlangwir bad ha ka por ba ki dang sdang ban leit buhai shnong ha Nonglang bad Mawkapiah ki dei kiba duk haduh katta katta, ki im da ka rep ka riang hynrei kaba sngewtynnad ka long ba ki jait Marweiñ na Nonglang bad Mawkapiah ki dei ki briew kiba ïabeh haduh katta katta ïa ka pule puthi bad ïa ka jingnang jingstad wat la ki long kiba duk hynrei ki trei shitom ban phah skul ïa ki khun haduh kine ki sngi.