Khliehriat, K’lyngkot, 19: Ka Seiñ Raij Tuber, East Jaiñtia Hills District, ha ka 17 tarik mynta u bnai ka la kynmaw burom ïa ka lyngkhuh sngi ïap kaba 356 snem jong u khlawait ka rilum Jaiñtia u Woh Tep Kyndait.
Ka dei ruh ka sngi ïam briew namarba ha kaba kum kane ka sngi u Woh Tep u la ïap ha ka kti jong ki nongshun bad kaba pynsngewsarong ïa ka rilum Jaiñtia ka dei namarba ka jingjop thma jong u Woh Tep Kyndait uba la ieng ïaleh pyrshah ïa u Syiem ka Jaiñtiapur, u Amratap Sing uba dei u Syiem Rangbah.
“Kaba kum kane ka sngi ka dei ruh ka sngi laitluid ka Raij Tuber bad ka sngi ka ban sah kynmaw pateng la pateng wat lada u Woh Tep Kyndait um don shuh hangne ha sla pyrthei ngim lah shuh ban tip kaei ka ban jia ïa ka riti ka dustur, ïa ka niam ka rukom jong ngi kaba la pyrshang ban pynduh pyndam ha ki por ka mynnor. Hynrei dei u Woh Tep uba la ieng rangbah ban ïakhun pyrshah ïa ki briew kiba nabar kiba pyrshang ban mushlia ïa ki riti ki dustur, ïa ka niam ka rukom kiba ka Seiñ Raij ka ñiewkor bad ka dang pynim pynkhlaiñ pynneh pynsah haduh kine ki sngi kiba mynta,” ong u President ka Seiñ Raij Tuber u Bah Helping Phawa.
Hapoh ka jingpynïaid jong u President ka Sein Raij, ka Seiñ Raij Tuber ka la pynlong ruh da ka leh niam leh rukom, ka nguh blei, ka kñia ka khriam bad la pyndep ïa kane ka leh niam da u Lyngdoh ka Raij Tuber bad la pynher ruh ïa ka lama jong ka Seiñ Raij da u President barim jong ka Seiñ Raij Tuber u Bah Julbi Sana.
La pynsngew ruh ïa ka khana shaphang u woh Tep Kyndait da u Bah Bevil Shylla u rangbah sai nia ka Seiñ Raij Tuber, uba la ïathuh bad pynsngew ruh ïa ka jinghiar thma jong u Syiem Ampratap Sing ïa ka Raij Tuber na ka daw ba u Woh Tep Kyndait na ka Seiñ Raij Tuber um treh ban pynkylla ïa ka niam ka rukom, ka riti ki dustur kumba la bthah da u Syiem Ampratap Sing.
Ha kane ka sngi la rwai ruh ïa ka anthem jong ka Seiñ Raij Tuber ba la ïalam da ki Seng Longkmie ba ka jingshad tynrai na ka kynhun Seiñ Raij Shnong Tuber Shohshrieh.
Kum ka jingsnohkti lang, ki nongïalam bad ki dkhot jong ka KSU Wapung Unit ba la lam khmat da u President ka KSU Wapung Unit u samla Deiniwan Lyngdoh bad ki nongïalam jong ka Jaiñtia National Council (JNC) Tuber Circle ba la lam khmat da u President u samla Training Phawa ki la leh burom da kaba leit buh syntiew ha u mot sahnam jong u Woh Tep Kyndait uba don ha ka shnong Tuber Kmaishnong.
Kum ban shu pyntip u Woh Tep Kyndait u dei uwei na ki khlawait ka rilum Jaiñtia na ka shnong Tuber Kmaishnong uba la ieng pyrshah ïa u Syiem Jaiñtiapur u Amratap Sing namarba une u Syiem u la phah kylla niam Hindu jubor ïa baroh ki khun ki hajar jong ka ri Khat-ar Doloi.
U Syiem u la phah da u Syiem Khynnah u Rapo Ram Sing ban ïaleh pyrshah ïa u Tep Kyndait ha kaba ki la ïakhun ïa ka thma ba la tip kum ka thma Nongsyntoiñ ha u snem 1669 bad ha kane ka thma u Woh Tep Kyndait u la jop bad u la pynliem ïa u Syiem Khynnah, hynrei dei ha ka por ba dang don hapdeng ka jingïakren ïasuk hapdeng u Woh Tep Kyndait bad u Syiem ka Hima Jaiñtiapur u Syiem u la pynïap ïa u Woh Tep Kyndait.
Kum ka dak ka jingkynmaw burom ïa u khlawait, ka Seiñ Raij Tuber ka la tei nam da u motsah kynmaw ha ka shnong Tuber Kmaishnong bad une u mot u don harud ka surokbah National Highway ha Tuber Kmaishnong.
U long u mot tei nam uba itynnad bad ba la shna pynwandur bha ha kaba ki briew ki lah ban rung bad ïaidkai shapoh une u mot.
La sakhi ruh ba bun ki briew kiba wan kai sha East Jaiñtia Hills District ki ju sngewtynnad ban leit kiew sha kliar u mot jong u Woh Tep Kyndait.
