Nongpoh, Nailur 01: Ka skulbah University of Science and Technology Meghalaya (USTM) ha ka sngi u Blei ka la kynmaw burom ïa ka sngi kha kaba 77 snem jong u (L) Purno A. Sangma, u Lamphang barim jong ka Lok Sabha uba la long ruh u Myntri Rangbah barim jong ka jylla Meghalaya.
Ïa u Purno A Sangma la kynmaw kum u nongsynshar uba long ka nuksa bad u nongshah ai mynsiem bad la kynmaw burom burom ïa u da ka jingbuh syntiew da ka iing ka sem jong ka USTM baroh kawei.
U Chancellor jong ka USTM u Mahbubul Hoque u la pynpaw ba u Purno A. Sangma u long u nongai mynsiem bad ka jingkyrshan kaba khraw ïa ka skulbah USTM naduh ba la sdang ïa ka uba long ruh kum ka jingshai ba ïalam lynti bad ka PA Sangma International Medical College and Hospital ka ban sa wan, ka jaka sumar kaba thymmai kaba la mynjur da ka kynhun Myntri jong ka Sorkar Meghalaya, ka long kum ka jingburom ïa u PA Sangma.
U Prof. GD Sharma Vice Chancellor pynthikna ba ki pateng ban wan kin dang bteng ban ïoh mynsiem na ka jingim bad ki jingthmu jong u.
U Dr. Rashna Dass Hazarika uba dei u Medical Superintendent ka PIMC u la pynpaw ba u Purno A Sangma u dei uwei na ki nongïalam ka jylla Meghalaya, kum u nongïalam ba ïohi jngai bad u nongseng ïa ka National People’s Party (NPP) kaba dei ka sengsaiñpyrthei ba nyngkong eh na ka thaiñ Shatei Lam Mihngi.
Ka pateng jong u ka dang iai bteng ban ai mynsiem ia ngi, bad ngi dang sngewnguh junom ïa u, u la pynpaw.
