Shillong, Lber 30 : U National President ka NPP ba dei ruh u Myntri Rangbah ka jylla, Conrad K Sangma ha ka sngi Saitjaiñ u la lum ïa ka jingïalang bad ki heh nongïalam ka BJP ha nongbah Shillong na ka bynta ban ïa kren halor ka elekshon MP khnang ba ki kyrtong jong ka party kin ïoh ïa ka jingjop na Shillong bad kumjuh na Tura Parliamentary seat.
Ha kane ka jingïalang u Conrad u la ong ruh ba ki kyrmen ba kum ka kynhun NDA kin ïoh ban khur ïa ka jingjop ha baroh ar tylli ki seat ha kane ka elekshon MP.
U Conrad u la ong ruh ba kadei ka kamram jong ka NPP ban ïa kynduh ïa baroh ki party kiba ai ka jingkyrshan ïa ka party ban ïa kren halor ka elekshon MP kaban long shen.
“Nga la kyntu ïa ki nongïalam ka BJP ba kin kyntu ïa ki nongtrei ka party bad ki nongïalam jongki mandal na bynta kane. Nga pynpaw ruh ka jingsngewnguh na bynta ka jingkyrshan jong ki ïa ki kyrtong jongngi bad kyntu ruh ïa ki ba kin trei shitom shuh shuh khnang ba ki kyrtong jong ka party kin ïoh ïa ka jingjop,” u la ong.
Halor ka jingkylli la ki nongïalam ka BJP kin wan neem ban ïalap elekshon ha Meghalaya, u Conrad u la ong ba ïa mynta um pat lah ban ong ei ei la kin wan ne kim wan hynrei u ong pat ba kaba kongsan ka long ïa ki nongïalam na ki shnong ki thaw bad naka thain kiba lah ban trei bad wanrah ka jingkylla.
Shuh shuh u pynpaw ruh ïa ka jingkmen ba bun ki nongïalam ka BJP na rilum Khasi bad Jaintia ki wan sha katei ka jingïalang bad pynpaw ka jingsngew jong ki.
