Nongstoiñ, Nailur 24: Ka Hill State People Democratic Party ka la pynkhreh ban pynlong ïa ka jingrakhe ïa ka lyngkhuh snem jong ka jingkhlad noh jong u (L) Maieit Hopingstone Lyngdoh, u nongseng jong ka party u ba ka jingkhlad jong u ka la dap shiphew snem thik ha ka 26 tarik mynta u bnai. Mynta u snem, ka HSPDP kan pynlong ïa ka jingrakhe ïa katei ka sngi ha ka shnong jong u ha Mawkyllei, Eastern West Khasi Hills.
Ki nongïalam ka party haba pyntip halor kane ki la ong ruh ba ïa ka jingnoh synñiang jong u (L) Maieit Hoping ïa ka jaitbynriew Khasi Pnar, ym lah shuh ban klet lano ruh namar ki matti ba u la iehnoh na ka bynta ki long dien, ki dei ki bym lah shuh ban pyndam wat hapdeng jong kane ka juk kaba ki jingkwah bor, kwah burom, kwah nam jubor ki la synshar bad shong kulai ha man la uwei pa uwei.
“Ngim lah ban len ruh ba ki matti ba khraw tam kiba u Maieit Hoping u la iehnoh, ki dei ka jingïakhih ban dawa jylla ba pura ha kaba da ki phew hajar ngut ki paitbah ryngkat ki lama ïong ki la tur khlem sheptieng bad da ki spah ngut ki volunteers ki la shah kem bad shah set phatok”.
Kiwei pat ki matti kiba u la iehnoh ha ki longdien ka dei ka jingbeh krad ïa ki kynhun shipai kiba la wan ban buh ktem ha pyntha Mawliehbah. Ka jinglah jong u Maieit ban beh krad ïa kitei ka kynhun shipai ka la pynlong mynta ïa ka pyntha Mawliehbah ba kan kylla long ka pliang ja jong ki phew tylli ki shnong.
Kiwei pat ki matti ba u la leh ban ïada ïa ki paitbah ka jylla da kaba leit beh krad ïa ki nongtrei ka UCIL kiba wan ban khlong ïa u Uranium ha Domïasiat South West Khasi Hills, namar lada ailad ban tih ïa utei u marpoh khyndew, kumba 90% na ki nongshong shnong ka jylla kin shah ktah ha ka radiation lane ka lyer bih kaba mih na u Uranium.
Kiwei kiwei pat ki matti kiba bun kiba ym lah satia ban jer lut kiba u la iehnoh na ka bynta ki long dien, ki la long shisha ki jingkyrkhu kiba ym lah ban batai. Wat la utei u nongseng ka HSPDP u la lah ban leh kat kitei ki kam na ka bynta ki paitbah nongshong shnong ka jylla. Hynrei kaba lyngngoh ka long ba ki paitbah nongshong shnong ha kine ki sngi, kim shym la kheiñ kor shuh.
