Kato ka kam pynbeit pud hapdeng U Conrad Sangma bad U Himanta Sarma, ka kynjah jak ha kine ki sngi bad katei ka pynlyngngoh ïa uba bun balang jong ka ri Khasi Jaiñtia, ba kumno sha kat kato ka jingshongshit jong U Sangma, U Bah Prestone Tynsong ban leit rung sha ki shnong ki thaw, wat ha ka miet ka ïong, hynrei mynta pat ka shu kynjah kynsan bad katei lehse ka pynlong ïa u paidlang ka jylla, ba un wad ïa ka daw.
Haba shu peit na kiei kiei kiba paw, imat kumba U Sangma, U bah Tynsong lem bad U Himanta, kim don satia ïa ka jingmut ban ïa pynbeit pud, hynrei ki don tang kawei ka thong bad kata ka long ban shim noh ïa ka jaka kaba 19 square kilometre sha ka thaiñ Khanapara ban ai sha ka Assam bad hadien ba ki la ïa mynjur ïa kata, ka pyni ba kim don jingmut shuh da kumwei pat, namar ba ki tip shai, ba tang shu poi sha Jaiñtia hills, kin shah dawa ban pynphai noh ïa ka Block I bad Block II bad tang shu poi sha West Khasi hills, kin shah dawa ban aiti noh ïa ka Langpih bad katei kan wan rah ïa ka jingduhnong ïa ka Assam.
Kam lei lei, hynrei ka jingshisha, ka long ba U Conrad Sangma lem bad u symbud myntri rangbah jongu, ki la knieh jubor ia katei ka jaka jong ka them Ribhoi, ban ai sha Assam bad ki la kheiñ dewthala, ïa ki trai jaka bad kumjuh ïa ki khlieh nong synshar jong katei ka thaiñ bad kumta, ki nong synshar ki la bitar laiñ bad kumta katei ka kam, ka poi sha ka jingïapyni bor ha kashari.
Ka elekshon MP, ka la kut bad lada kitei ki arliang mamla, ki don shisha ïa ka jingthmu kaba beit, ki la dei ban ïaid stet noh ban pynkut ïa katei ka kam, namar ba ha u snem ban wan, kan wan sa ka elekshon MLA ha Assam bad hadien katei ka elekshon, ngim tip shuh, la U Himanta Sarma, un dang wan phai biang ne em ha ka sorkar bad kaba ma ka long, ba tang shu bujli ka jingsynshar kumta kitei ki jingïasoi soskular, ki la poi sha tin bret ñiut.
Mynta ka la dei ka kamram jong ki MLA jong ka liang synshar lane ka liang pyrshah ruh kumjuh, ba kin ïit bniah ïa kane ka kam, la ka dang ïaid ne ka la sangeh bad ba kin tip ïa ka daw jong ka jingpynstet tasam ïa ka bynta kaba nyngkong jong ka jingïakren bad nangta, ba ka shu sangeh kynsan ha kane ka dur bad ba kin tip ruh ïa ka lut ka sep, ha ka leit ka wan, ka ïaid ka ïeng, ka siew ka tda bad ka jingïaleh mukotduma hapdeng ka sorkar bad ki riew paidbah, kiba pyrshah ïa katei ka soskular kaba nyngkong.
Ngin donbok, ba kane ka kam, kan ïaid shakhmat, ha kaba ka jing ïatip lem, kan treikam ha ki Nongïalam jong ka sorkar Assam bad Meghalaya; hynrei ka jingshisha, kaba ngim dei ban klet bad kata ka long, ba lada ka phase II kam ïaid kam, kumta, dei ban pynduh syndon ïa katei ka soskular baroh kawei bad kito ki jaka, kiba la dep aiti sha ka Assam, dei ban pynphai noh sha ki trai, namar ba kam ju shonghok hi ruh, ha ka aiñ jong U Khasi, ba ïa ka khyndew, yn long trai da u Myntri rangbah ne u Symbud myntri rangbah, hynrei ka khyndew lada ka dei ka shi phut ne ka shi hectare, ki don ïa la ki jong ki trai hok bad haba ka don ka jingthombor ne knieh jubor, ka dei ka kamram jong ka sorkar jylla, ba kan ai jingïada, hynrei lada ka kamram jong ka sorkar jylla, ka long ban pyndie lilam pynban, ïa ka hok jong u duk u rangli, kumta katei kam dei shuh ka sorkar jong ki nongïalam, hynrei, ka dei noh ka sorkar jong ki nonglilam.
Lah ban pynkymaw ba dangshen u Chairman ka Regional Committee jong ka West Khasi Hills District u Bah Paul Lyngdoh u la ong ba ka jingïakren pynbeit pud hapoh ka thaiñ Langpih na ka liang ka sorkar jylla ka dang ap ïa ka jingai ktien na ka liang ka Assam bad ki kot ki sla na ka bynta ka jingpynbeit pud ha ki jaka ba ïakajia bad ïa kine ki kot lah dep ruh ban pyni sha ka Assam hynrei kaba sah mynta ka long satang ban leit jurip khatduh ïa ki shnong ha thaiñ Langpih khnang ban ïoh shim ka rai ba khatduh.
