Kynjah jar bad rit ka die ka thied ha Ïewduh ha ki sngi Puja kumba 60% ki dukan ki khang lut

Shillong, Risaw 05: Katba ka jinglehniam puja ba lai sngi ki riewngeit Hindu kaba la sdang naduh ka sngi U Blei haduh ka sngi Balang la sakhi ïa ka jingkynjah ka ïew bad ka jingkylluid ka rung ka mih ha ïewduh kaba dei ruh ka ïew ba heh tam ha ka jylla namar ka jingkhang dukan ki riewngeit Hindu ban ïoh shim bynta ha ka lehniam puja.
Ha ka jingleit rung ban ïaid tawiar ïa ka ïew da u Mawphor sha ïew la ïohi ba jan baroh ki dukan ha basa jhur, basa soh bad kiwei kiwei ki basa ki khang lut bad ki nongwan ïew ruh ki duna bha namar ka jingbym don dukan kiba plie. Ha kane ka jingleit jurip la lap ba palat 60% ki dukan ha ïew ki khang lut bad ki lynti ruh ki kylluid shibun shah lada nujor ïa kaba man ka sngi.
La ïohi ba kiba plie dukan ki dei tang ki Khasi kiba shong ha khmat ki dukan ban shong die khutia bad ki jaiñ seconhand bad katto katne tylli ki dukan ki riewngeit Muslim.
Haba kren bad ki katto katne ki nongshong ïew ki la ïathuh ba kane ka jingkynjah ka ju long hi man la u snem ha ka por puja ha kaba ki la ong ruh ba wat ma ki ba plie dukan ki rit ïew lang namar ka jingduna kiba wan siew wan tda wat ki Khasi ruh.
Ki la ïathuh ruh ba ka jingrit ka ïew ha ka Puja ka kham palat wat ban ïa ka jingrit ha ka sngi U Blei bad kiwei pat ki sngi lehniam jong kiwei pat ki jait jingngeit niam kum ka jingrakhe Id ki riewngeit Muslim.
“Ki ju ong ka ïew ka dei ka pliang ja u Khasi hynrei na kane ka jingkhang dukan ba kumne phi la sngewthuh hi kadei ka pliang ja jong no” ong ka kiba bun bah ki nongïew.
“Nga la shong ïew la palat arphew snem bad nga peit kat nang mih ki sngi ka ïew ha ki sngi puja ka nang kynjah bad kane ka kdew ba ki bym dei Khasi ki la nangbun katba nang mih ki sngi bad kaei kabn jia hadien 10 snem ñiuma ïoh hap khang syndon ïa ka ïew baroh kawei ruh” ong uwei u Rangbah bym kwah ban pynpaw kyrteng
“Lada peit bha wat ki briew jong ngi(Khasi) da khang dukan ki bym dei Khasi ki kulmar ban thied jingthied ïoh ki duh mar wat la ki wan ban thied Dohkha ne ki mar ba ki Khasi ki die ruh bad kane ka pyni ba ka jingmut jigpyrkhat jong ngi kaa la shniah beit ha kiwei ki jaidbynrïew(emotional dependence)” ong sa ka longkmie ba die soh ha ïew.