Nongpoh, Naitung 25: Kum u National Secretary ka BJP bad uba dei peit ruh ïa kajylla Meghalaya, U Anil Antony ha ka sien kaba nongkong u la wan poi sha ka jylla Meghalaya hadien ba la thung ïa u kum u nongpeit nongkhmih ïa ka jylla Meghalaya bad shuwa ban poi sha ka Nongbah Shillong hynnin ka sngi u la hiar ha Nongpoh na ka bynta ban ïa kynduh ïa ki nongïalam bad ki nongkyrshan ka party BJP na Ri Bhoi.
Haba wan jngoh ïa ki nongïalam bad ki nongtrei ka party BJP ha Ri Bhoi, la pynlong ruh ïa ka jingïakynduh lang ha ophis treikam ka BJP ha Nongpoh, ha kaba la pdiang burom ruh ïa u da ki nongïalam ka BJP Ri Bhoi ba kynthup naduh ka Kong Marian Maring, u Prahlad Singh Toor, President ka BJP Ri Bhoi, u Bah Sen Thabah bad kynthup ruh ki nongïalam ka Jirang Mandal, Mahila Morcha bad kiwei kiwei ki nongïalam.
Ha kane ka jingwan kynduh u Anil Antony ïa ki nongngïalam ka BJP na ka Ri Bhoi District, la don ryngkat ruh u State President ka BJP, u Rikman Momin, ha kaba ki la ioh lad ruh ban ïa kren ïa ki kam bapher bapher jong ka party ha Ri Bhoi bad kumjuh ruh ha ka jylla hi baroh kawei.
Kine ki nongïalam ka BJP na Ri Bhoi, ki la pynpaw ruh ïa ka jingkmen ba ki la ioh lad ban kynduh ïa une u nongïalam ka BJP ba dei peit ïa ka jylla Meghalaya bad ki la pynpaw ruh ka jingsngewkmen namar ba u dei u na juh ka kynhun Khristan na Kerala bad ruh uba dei u khun jong u Myntri rangbah barim ka Kerala.
