Nongpoh, Risaw 02: Shibynta ban wanrah ka jingïatylli, ka jingïaieid bad ka jingithuh iwei ïa iwei kum shipara hapdeng ki para samla khasi kiba pule ha skulbah Regional Institute of Science and Technology (RIST) bad University of Science and Technology, Meghalaya, ka Khasi Student Union RIST-USTM Unit mynta ka sngi kala pynlong da ka jingïakynduh lang (Fresher’s Meet) jong baroh ki samla pule khasi kiba pule ha katei ka university.
La wan ruh ban sakhi ha kane ka sngi da u Samla Pynkmenlang Sanmiet Education Secretary ka KSU sengkmie kum u kongsan haka jingdon lang u samla Ferdinald Kharkamni President KSU NKHD, Samla James Hitler Mawphñiang General Secretary, Samla Toning Lapang Secretary Education Cell bad kiwei kiwei ki nongïalam naka district bad sengkmie.
Ha katei ka sngi la ioh ruh ban pynskhem ïaki nongïalam ba thymmai jong ka KSU RIST-USTM Unit 2023-24 bala wan ban pynskhem da u Samla Pynkmenlang Sanmiet kiba kynthup ïa u samla Adviser- Jefferson, President-Nickson E Thabah, Vice President-Richie C Lyngkhoi, General Secretary-Balasumar Sohkhwai, Organizing Secretary-Rapseibor Syngkli, Finance Secretary- Bashida Kharlatang, Publicity Secretary-Bakyrmen Passah, Education Secretary- Chipper Lathong, Socio Cultural Secretary-Raymond Nongkhlaw, Sports Secretary- Hame Arkini Sutnga, Women Representative-Risbun Lyngdoh, Displinary Secretary- Sdangmi Lhuid lem bad 13 ngut ki dkhot ka EC.
Haba kren ha kane ka sngi naka liang u Samla Pynkmenlang Sanmiet Education Secretary ka KSU u la ong ba ka long ka jingkmen kaba khraw bala pynlong kum katei ka jait prokram ban kynduhlang ki samla pule khasi ban tip bad ithuh iwei ïa iwei kum shipara ha sawdong sawkun jong katei ka jaka pule ban wanrah ruh ka jingïatyli bad kyrshan iwei ïa iwei ba ki samla khasi kiba pule ha katei ka jaka kim dei ban mad jingeh.
Namarkata kum u nongïalam ka KSU u la ai mynsiem ïaki samla pule ba kin minot thop haki jingpule jong ki bad ban pynim ïaka riti ka dustur haba ki don ha kano kano ka jaka, ba kin long ruh ki khlur ba tyngshaiñ haka jingim jong ki.
