Kynduh ka Shnong ïa u DC ka Ri Bhoi ban pyrshah ba ïoh ktah ka tyllong umbam na ka surok 4-lane

By Mawphor Editor On Mar 25, 2025

Nongpoh, Lber 24: Ka shnong Mawpunkshaid kaba don ha Ri Bhoi District mynta ka sngi ka la leit ban ïakynduh ïa u Deputy Commissioner ka Ri Bhoi, kaba dei hadien ba ka Dorbar shnong ka la rai ban pyrshah ïa ka jingwan ka surok 4-lane na Umïam sha Malidor, ba ka lah ban ktah ïa ka tyllong umbam umdih jong katei ka shnong ha ka jaka ba thmu ban pynïaid ïa katei ka surokbah.
Hapoh ka jingïalam u Rangbah shnong, u Bah Bandari Ryntathiang bad ki nongïalam ki la ïoh lad ban ïakynduh ïa u Deputy Commissioner ka Ri Bhoi, u Abhilash Baranwal ban pynsngew halor ka rai jong ki paidbah bad ruh ban aiti syndon da ka dorkhas, kaba ki pyrshah ba ïoh ka tyllong umbam umdih ka lah ban ktah da ka jingwan katei ka surokbah.
Haba kren sha ki lad pathai khubor, u Bah Bandari Ryntathiang, u la ong ba ka Dorbar shnong Mawpunkshaid kam pyrshah satia ïa kata ka jingwan ka surok 4-lane ba pynïasoh na Umïam sha Malidor, hynrei kaei kaba ka shnong bad ki nongshong shnong ki pyrshah ka dei ka jingsheptieng ba ïoh ka ktah ka tyllong umbam umdih ba ki paidbah nongshong shnong ki shaniah ïa ka tyllong um na katei ka jaka ba ki thmu ban pynïaid ïa katei ka surokbah.
“Kaei kaba la pynkmen ïa ka shnong hadien ba la pynpaw ïa katei ka phang ka jingshah ktah ka tyllong umbam umdih bad ruh ba la aiti da ka dorkhas, ka dei ka jingkular u Deputy Commissioner ban shim khia halor kane ka kam,” ong u Bah Bandari Ryntathiang, bad bynrap ruh ka Shnong Mawpunkshaid ka kren shai ba kam don ka jingpyrshah ïa ka jingwan katei ka surok bad ka sngewkhia ba ïoh ka ktah pat ka tyllong umbam umdih kaba long ka jingeh ïa ki nongshong shnong lada shah ktah ka tyllong umbam umdih da ka jingwan katei ka surokbah,” u la bynrap.
Namarkata, na ka liang ka shnong ka kyrpad ïa u Deputy Commissioner ka Ri Bhoi ba un shim khia halor kane ka bynta bad ban pynthikna ruh ba ka jingwan katei ka surokbah kan ym dei ban long ka jingtim ïa ki paidbah nongshong shnong namar ba kim don pat da kawei ka tyllong umbam umdih bad lada ka ktah ka long ka jingtim ïa ki khun ki kti jong ka shnong ha ka pateng ban sa wan, u la bynrap.