Kyndang ka EC VPP ym tang ïa ki Casual hynrei wat ïa kiba la pynskhem da ki EC barim ha KHADC

Shillong, Jymmang 3 : Ka Voice of the People Party (VPP) kaba ïalam ïa ka Executive Committee (EC) ha Khasi Hills Autonomous District Council, kala kyndang bad behkam ym ïa ki nongtrei Casual hynrei ïa ki nongtrei ba la thungkam pura (Permanent) da ka Executive Committee (EC) barim.
Kine ki lanot kiba don kumba 27 ngut, kynthup ïa kiba la shah behkam syndon bad kiba shah pynhiar kyrdan na ka jinglong Nongtrei ba pura sha ki Nongtrei Casual, hynne ka sngi Ba-ar kila leit pan jingpynshai na u Chief Executive Member (CEM) Bah Shemborlang Rynjah hynrei phewse kila ïoh da ka jubab ba ka dei ka rai jong ka EC bad ka EC kam lah leh eiei shuh ïa ki.
Ka jingleit ïakynduh jong kine ki Nongtrei ba shah behkam ka long eh ban kyrpad ïa u CEM ba un pyrkhat thymmai biang ïa ka rai jong ka EC bad ban thung biang ïa ki ha ka kam ba ki trei.
“Ngi la kyrpad ïa u CEM…ngi la ïathuh ïa ki jingeh jong ngi, ki jingeh ban pynbit pynbiang ïa ka ïing ka sem, ki ram kiba ngi shim na ki Bank bala ai NoC da ka Ophis ban thied jaka ban shna ïing bad ter ter..kumno shuh ngin lah siew ïa ki? Hynrei ka jubab na u CEM ka long beit ba ym don lynti shuh ïa ki da kumwei pat” ong ki nongtrei kiba la ïalum lang ha phyllaw ka KHADC.
Jan baroh na kine ki nongtrei ba shah beh kam ha ka EC ka VPP ki dei ki Nongtrei Casual kiba la trei la palat 5-6 snem hapoh ka Council bad ka Executive Committee ka NPP bad Congress kala pynskhem pura ia ka jingthungkam ïa ki ha u snem 2024 hadien ka jingbishar ïa ki jingshakri ba kila ai ïa ka Council.
Kine ki Nongtrei ki dei kiba trei ha ki tnad bapher bapher hapoh ka Council ba kynthup ïa ki constable ka tnad Enforcement, ka tnad Forest, Professional Tax bad kiwei kiwei.
Haba iakren bad ki nongthoh khubor, kine ki nongtrei ba shem apot kila pyntip ba ka Executive Committee ka la shu pynmih hukum syndet syndet bad ïa kine ki hukum, la ai sha ki hapdeng ka kam da ki Ophisar na ki Tnad ba ki don.
Haba kylli, kine ki nongtrei kila pynpaw ba ka lynti ïa ki mynta ka long satang ban pynlong ïa ka jingïakhih ha phyllaw jong ka Council bad ka jingleit mudui da ka mukotduma sha ka ïing Bishar ban pan ïa ka jingbishar kaba hok.
“Ngin sa ïashong bad ïakren para ma ngi shuwa ba ngin shim ïa ka rai kaba dei ban shim” kila ong.
Lah ban kdew hangne, kum kine ki jingïakyndang briew ne nongtrei ha KHADC ka dei kaba ju jia beit ha man ba don ka jingkylla ha ka synshar khadar khamtam haba shimti da kiwei pat ki seng saiñ pyrthei ban pynïaid ïa ka Executive Committee (EC).
Kane ka jingkyndang nongtrei ka dei ka raibi bala ïaid da ki phew phew snem hapoh KHADC. Ki EC ba thymmai ki ju kyndang tang ïa ki nongtrei casual ban ïoh thungkam bujli pat dala ki jong ki briew lajong, ban pynhun ïala ki nongkyrshan ne nongthep vote ne ki bahaïing hasem. Bad kam pat ju jia satia ba ki EC barim kin weng kam ïa ki Nongtrei kiba la dep pynskhem thungkam pura.
Ka jingkylli ka mih mynta halor ka jingthmu jong ka VPP ban kyndang ïa kine ki nongtrei bala thungkam pura…hato ka VPP ka thmu ban pynkhuid ïa ka raibi-ka jingthungkam sopsop hapoh ka Council, ka jingthungkam tang ïa ki briew ki riewsaiñ pyrthei ne bahaïing hasem bad ban pynïaid noh ha ka lynti kaba dei ha ka jingthungkam thungjam….?
Baroh ki ïohsngew bad ïatip ba ka VPP ka kam ba ka ïeng ha ka nongrim ban wanrah ïa ka synshar khadar kaba khuid, ban kyndang lut ïa ki kam jaboh jabaiñ, ki jingthungkam bymhok, thungkam da kaba jied bahaïing hasem ne paralok parajor hynrei ki kam kiban jia ha KHADC kin sa pyni la kane ka nongrim jong ka VPP ka dei kaba shisha ne ka dei tang ka nia/jutang pynbiej paidbah ha ka por elekshon?.