Mawkyrwat, Jymmang, 04: Ka Khasi Students’ Union (KSU) jong ka Ranikor Unit ka pynpaw ïa ka jingsngew bynñiaw shikatdei ïa ka jingbym lah ki kompani bapher bapher kiba la pynïeng kynjreng la ki mot nar (Tower) jong ki ban pynbiang ïa ka network connection ha ka thaiñ bad kane ka pynpaw ba kane ka jingbym shimkhia ki bor ba dei peit ka pynlong ‘langkñia ïa ki paidbah nongkyndong bapli bad wanrah ïa ki shibun ki jingduh jingmyntoi.
Na ka liang ka seng ka la ju ïakynduh barabor ïa kine ki kompani bad wat ha ka ophis jong ka Deputy Commissioner, South West Khasi Hills District, pynban kiba kut pat tang ha jingkular ktien bym poi thew sha ki kam.
Ha kane ka juk mynta, ka jingpyndonkam ïa ki kor ki bor ka internet bad ki jingïakren lyngba ki mobile phone ki la kylla long ka jingdonkam ba kongsan eh ha ka jingim ba man ka sngi. Namarkata, ka jingbym biang lane ki jingthut ha kane ka bynta ki wanrah ïa ki jingeh bapher bapher kaba ki paidbah ba manla ka sngi ki ïa kynduh khamtam ha ki thaiñ nongkyndong bad kane ka pynnoh shilliang ïa ka tarajur haba ïa nujor bad kiwei pat ki bynta jong ka jylla bad ka pyndkoh ïa ka jingstet ban treikam ha ki bynta baroh.
Ha kaba ïadei bad kane ka jingeh ba ki paidbah ruh ki la ïa kynduh la bynñiaw uwei na ki nongshong shnong kane ka thaiñ da kaba ong, “Ngi shem jingeh shibun na kane ka jingbymbiang network, teng teng tang ban pyntip haba pang shitom ne haba jia ki jingjia ba sngewsih ruh ngim lah shuh ban pyntip dei por”. Ñiuma, kita ki khep ki dei kiba hateng eh ban jia hynrei ki long ki jingeh kiba kongsan pat na ka bynta ka longïing kiba ïa kynduh bad kiba lah ban poi sha u pud jingdier por ban leh ïa ki bynta ba donkam kum haba pang ba shitom.
Ha ka kyrwoh na ka seng la ong ruh ba kaba katno tam lei na ka bynta kito kiba trei ïa ki kam lajong ha ki liang bapher bapher kiba shaniah ha ki kor ki bor ka phone bad internet, kane ka ktah shibun ïa ka kamai jakpoh jong ki. Nangta, ym lah ruh khlem da kdew ïa ka jingeh ki khynnah bad ki samla pule ha kane ka juk kiba hap ban wad jingtip ha kaba ïa dei bad ki jingpule jong ki khamtam na ka bynta ki samla ba hap ban wad ki lad pynrung klas lyngba ka online system, hynrei phewse da ka jingbym biang jong ka network bun sien ka pynduh mynsiem ïa ki ruh ban ïaid shakhmat.
“Ngi sngewdiaw halor kane ka jingleh bym suidñiew ki network kompani namar ka don jingmut aïu ïa ki ban pynïeng kine ki tower khongreng khlem ka network. Kumta ka seng dawa namarkata, lyngba ka kyrwoh khubor sha ki kompani baroh ba kin pynbit pynbiang noh kloi lyngba ki tower bad lada ki ïai tynjuh shi ïai tynjuh ïa ka jingïaishah jong ki paidbah, na ka liang ka seng kam banse ban hap pyrkhat bad shim da ki sienjam ba tyngeh,” ong u kyrwoh na u President KSU Ranikor Unit, u samla Firstborn Turñia.
