Shillong, ïaïong, 02: Kawei ka kali Maruti Eeco Van kaba don ïa u number ML05 AC 3155 ka la kylla khongpong ha surokbah
Shillong-Jowai ha Jingkieng Nongthymmai ha ka por kumba 12:20 baje shiteng synnia sngi Balang.
Kane ka kali kaba la kylla khongpong ka la leit tynrah pat ïa kawei ka Departmental Store ba la tip kyrteng kum ka Cellar.
Ha kane ka jingjia, phra ngut ki briew kiba shong hapoh ka kali bad u nongñiah ki la lait thaw da ka said na ka jingmynsaw bad na ka jingjia basngewsih.
Katkum ka khubor ba la ïohlum la ïathuh ba kane ka kali ka dei kaba kit ïa ki nongtrei jong ka Heritage Club of Tripura Castle.
Ki Pulit kiba la ïoh jingtip halor kane ka jingjia ki la leit ban ai jingïarap bad ban tan noh sha thanat ïa ka kali kaba la julor. Ka jingtohkit halor kane ka jingjia ka dang ïaid shakhmat.
